عجبي على دنيا عجيبة ... بتغوص و بتعلي
عبثية ســــــيرة اهلها ... لا اقول و لا تقولي
هي العجــــايب كلها ... ما تضغطيش يا اللي
نهشتي قلبي بســــــنانك ... و ليــه مناك ذلي
عمري ما هاخضع لغيره ... سبحانه متجلي
كـــــرم عباده كلهم ... نظــــــــرة يا متولي
أما الهدية النهار دا ... ها يقولـــــــها حكواتي
ميكانيكي يلعب بالحجر و البيضة ... قــرداتي
كتكوت ها يطلع يبتسم ... يلحس ملفـــــــــاتي
في لحظة يخفي الاسامي ... و يسيبك بقى تهاتي
و بدون ما ترمش بعينك ... تلقى اللي راح آتي
فسر كلامك يا أسطى ... احضرنا يا بخــاتي
ما تقول يا اسطى و فسر ... طيرت نفوخاتي
يا بو العزيزة سحر ... ها اشرح و اقول على طول
افتــح مجلد و ابتسم ... و اعطيها طبقين فــــــــول
و احبس بشاي ام حسن ... على قهوة رجب بهلول
يا واد يا بلية بالعجل ... رص الكراسي و قــــول
كل الحبايب يحضروا ... ف الورشة و انا مسئول
أسطى .. معلم ... أو صبي .. ييجي معاه كشكول
شرح النهار دا مختلف ... سلطاني .. مش معقول
يا بلية اقعد قصـــــادي ... كل اللي اقوله تعمله
و اللي ها يرمش بعينه ...هاتهولي و انا ابهـدله
افتح مجلد يا ولد ... املاه و ما تعــــــــــــد له
جواه مجلد و صورة ... من كل نوع حمــــله
الوقتي صحصح معايا .. الحاوي جهز جدوله
حلوة صلاة النبي .... أصل الجراب ملــــــــــــــــــــــيان
على Shift و اضغط يا ولد ... و View تدوسها كمان
و Thumbnails تتنقر .. عجبي على اللي كـــــــــــــان
كل الأسامي اختفت ... يمكن محاها الجـــــــــــــــــــان
يا أسطى حصلت معانا ... و قرينا لها الفنجـــــــــــــــان
راحت كل الأسامي ... من يومها ف خبر كـــــــــــــان
ما تقول يا أسطى و دلنا ... القلب بقى تعــــــــــــــــبان
يا واد يا بلية حلها ... حاضر يا أسطى ها احــــــــــــل
ها اروح View مرة تانية .. و اضغط Details و افل
Icons و List و Tiles .. أي واحدة تحــــــــــــــل
و السر جاي خللي بالك ... من تاني Shift يا خـــل
و على View مرة تالته .. و Thumbnails يا ول
ول يا ول يا ول يا ول
و الأسطى بتاعنا غلب الكل
تفسير للي ممكن ما يفهمش الكلام اللي فوق
الضغط على Shift مع نقر Thumbnails بيخلي اسماء الملفات و الفولدرات تختفي
لو عايز ترجعها تاني
انقر على List او Details او Tiles او Icons
و بعدين مرة تانية تضغط على Shift مع Thumbnails
ليست هناك تعليقات:
إرسال تعليق