.
يا ليل
طولك يلهلب قسوتي
و يزيد في شوقي لحضن أمي
يشدني ابوس حنانها
اللي منبت من تراب
اتمنى انه يضمني
.
الأربعاء، 1 يونيو 2011
الجمعة، 13 مايو 2011
لا تترعوا الأقداح .. حطموا الكؤوس
.
احرق كتابك و انطلق
و ارم الفؤاد المنخنق
و اسلك سبيل اللا رجوع
و احذر قلوبا تسترق
من بعد ذبحك يا نزق
كل المعابد تحترق
النور في الوهم انزلق
و الحلم في الدمس انغلق
من ذا ارعوى ؟
من ذا أبق ؟
أطلق رصاصك
ها قد وصلنا المفترق
.
الأحد، 8 مايو 2011
هي الأرض مربعة يا مؤمن ؟
.
شوف سعادتك
سعادتك لو رسمت خطين متعامدين
و حددت على الأطراف الأربعة الجهات الأربعة
شرق .. غرب .. شمال .. جنوب
لو وصلت النقط الأربعة ينتج إيه ؟
ينتج مربع
المربع دا نتيجة توصيل الجهات الأربعة
و الجهات الأربعة واقعة في حيز الأرض
و عليه
الأرض مربعة
شايفك بتضحك في سرك
خد بالك
كدا ممكن تصاب بلعنة مولانا الشيخ
مين الشيخ دا ؟
دا يا افندينا كان تحليل علمي رائع
تحليل من واحد من اياهم
ربنا يجعل كلامنا على قلبهم خفيف
مولانا الشيخ دا من الجماعة اياها
تشوفه ماشي في سمت العلماء
و تشوف المريدين بتوعه
تتخض .. تزبهل .. يحصل لك انشهاق بؤري
..
من كام سنة
أيام ما كنت لسه بلية
سألني مولانا الشيخ :
إلا قول لي يا واد يا مهندز
هي الأرض مربعة ؟
حصل لدماغي شخبطة زي باليتة الفنان
طب ازاي يا شيخنا ؟
قام شيخنا ضارب لي التحليل اللي فوق
..
الله
طب ازاااااااي ؟
ازاي اسلم مخي لجماعة دا قطب كبير فيها ؟
و ازاي أسلم وطن لجاهل مقامر ؟
الموضوع محتاج وقفة ..
..
كان فيه عالم كبيييير قوي
عالم .. بيعتبر كعبة للجماعات اياها
العالم دا كان بيقول ايه
كان بيقول :
اللي يقول ان الأرض كروية يبقى كافر
..
واد يا بلية
البخاخة يا واد .. رش الورشة
.
الجمعة، 29 أبريل 2011
الشعب يدوس رقبة السباعي
.
الشعب يدوس رقبة السباعي
الشعب يدوس رقبة حماة السباعي
الشعب يريد تطهير النيابة
الشعب يريد تطهير البلد من كل الفاسدين
النظام اللي غار كان واطي
علشان كدا كان بيلجأ لكل واطي
و كان بيبعد الشرفاء
..
طيب
هو السباعي و أشباهه ها يفضلوا كتير ؟
الشعب يسحق رقبة السباعي
و كل سباعي
.
أقوم أنام بقى
.
السبت، 23 أبريل 2011
لخبطات اسطى يا دوب صاحي من النوم
.
.
ستة و تلاتين ساعة و انا نايم ..
اصحى الاقيني في دموعي عايم ..
من غير جمال في رمال هايم ..
عاوز ارسي على بر يا ولداه
.
يلقفني كاب أو عمة ..
أو منجل أحمر أو نجمة ..
أو عم سام ابن الهرمة ..
نفسي استريح يا عباد الله
.
يا ليلى ناوليني اديكي ..
دا انا بالعيون و روحي افديكي ..
و اشيلك في صدري و احميكي ..
من غير تعب ما تكونش حياه
.
اضرب بعزمي الفاس للخير ..
و ف مصنعي المخ خطير ..
مدرستي في المسجد و الدير ..
و بكره جايب النور وياه
.
اقوم آخد فنجان قهوة عربي بحب الهال
.
الاثنين، 11 أبريل 2011
ليلة سقوط خنزير
.
.
يللا يغور خنزير
خلي البلاد تنضف
.
فاتنا الحمار و ارتاح
و القرد راح بجراح
.
من بعد ست عقود
دم الوطن أشرف
.
.
الأحد، 10 أبريل 2011
ذكراك يا أعز الناس
.
أمي ..
ليرحمك الله
.
اللهـــم .. اغفر لها و ارحمها و اعف عنها
و أكرم نزلها و وسع مدخلها و اغسلها بالماء و الثلج و البرد
و نقها من الذنوب و الخطايا كما ينقى الثوب الأبيض من الدنس
اللهـــم .. أنزل على قبرها الضياء و النور و الفسحة و السرور
اللهــــم .. أبدلها داراً خيراً من دارها و أهلاً خيراً من أهلها
و أدخلها الجنة و أعذها من عذاب القبر و من عذاب النار
اللهــــم .. اجزها عن الإحسان إحساناً ، و عن الإساءة عفواً و غفراناً
اللهــــم .. آنسها في وحدتها ، و آنسها في وحشتها ، و آنسها في غربتها
اللهــــم .. أنزلها منزلاً مباركاً و أنت خير المنزلين
اللهــــم .. أنزلها منازل الصديقين و الشهداء و الصالحين و حسن أولئك رفيقاً
اللهــــم .. اجعل قبرها روضة من رياض الجنة ، و لا تجعله حفرة من حفر النار
اللهــــم .. افسح لها في قبرها ما بين المشرق و المغرب ، و انقلها من ضيق اللحود إلى جنات الخلود
اللهــــم .. قِهِا السيئات (وَ مَن تَقِ السَّيِّئَاتِ يَوْمَئِذٍ فَقَدْ رَحِمْتَهُ )
اللهــــم .. اغفر لنا و لها ولجميع المؤمنين و المؤمنات و المسلمين و المسلمات الأحياء منهم و الأموات يا رب العالمين
الأحد، 3 أبريل 2011
أنا الشعب عاصفة طاغية
.
.
القصيدة دي خطفتني النهار دا
يمكن علشان متناغمة مع المود بتاعي حاليا
..
دي كلماتها
..
أنا الشعبُ زلزلة ٌعاتية
ستخمد نيرانَهمْ غضبتي
ستخرس أصواتهمْ صيحتي
أنا الشعبُ عاصفةٌ طاغية
***
أنا الشعبُ قضاءُ اللهِ في أرضي
أنا الشعب
على قبضةِ إصراري
سيفنى كلُّ جبارِ
ولن يقهر تياري
أنا النصرُ لأحراري
غداة الحشرِ في أرضي
أنا الشعب
***
أنا الماضي ... تيقظتُ أرى مصرع آلامي
أنا الحاضر .. أحلامي على مفرق أيامي
أنا المستقبلُ الزاحفُ في أرضي
أنا الشعب
.
عملت لها الفيديو الخفيف دا
.
الأغنية
نظما
و لحنا
و غناء
يمنية خالصة
.
احذروا زلزلتي العاتية
.
الرئيس المخلوع
مخلوع ؟!!
هو اتخلع امتى ؟!!
و الخلع دا على ايد محضر من المحكمة ؟!!
و اللا الخلع بسبب المرجيحة ؟!!
المهم
آهي حالة خلع و خلاص !!
نرجع تاني
الرئيس المخلوع
كان وجهة نظره دايما ان احنا كتير
و ما فيش مشكلة انه يروح 1000 في عبارة
او كام 100 من الصفوة في طيارة
او كام مليون شاب يهجوا من البلد
او آلافات تغرقهم لقمة العيش
او حتى كام مليون يتنسفوا
علشان الحمل يخف عن سيادته
..
حلو
..
افكار جنابه كانت قناديل نور
او قناديل بحر
كله ما يضرش !!
..
خلينا نقتبس فكرة من افكاره الجهنمية
..
إرادة الشعب غول
و اللي يقف قدام الغول يبقى مهبول
و يبقى عبيط اللي يقف قدام إرادة شعب
و احنا بصراحة لسه شايفين عبط كتير
عبط لسه فاكرين الزمان ها يرجع تاني
..
انا باظن كدا و الله أعلم
صبر الشعب قرب ينفد
انا خايف عليكو
اقل شئ ها يعمله الشعب
ها يحفر حفرة في الصحرا الغربية
تاخد لها كدا قول : مليون و نص
الشعب ممكن يحطهم في الحفرة
و يردم عليهم
و كأن شيئا لم يكن
و مصر ولادة
و مش لسه ها تولد
لا .. دي ولدت
و اللي يغور ممكن يحل محله ملايين
اللي يغور دا .. سياسي .. شرطي .. عسكري
أيا من كان
..
باكرر النصيحة
صبر الشعب قرب ينفد
ممكن ايد الشعب توصل لأي رقبة
مهما كبرت الرقبة دي
و مهما الرقبة دي ظنت ارتفاع قيمتها
لا قيمة تعلو فوق قيمة الوطن
و أنا الشعب
أنا الوطن
و احذر .. احذر .. احذر
غضبة الوطن
.
عاوز افهم ..
مين الغبي اللي صرح بإقامة مباراة الزمالك و الأفريقي في ستاد القاهرة ؟
هو كان قاصدها ؟
طب عليا البرنجان بالطماطم البنفسجي
الحركة دي مقصودة
و بقى لي في الدنيا سبعييين سنة
بحبحها شويه يا اسطى ( تسعييين سنة )
و رأيي إن كتييير من المشنوقين ..
بيتشنقوا بحبل كانوا بيجهزوه لشنق غيرهم
.
الاثنين، 28 مارس 2011
خمسة ليبرالية
.
واحد بيقول : ليبرالية تعني :
الواحد يقدر يشوف مراته و هي لابسة .. أستغفر الله العظيم
دا كلام واحد قاله
…
طب ما تيجي نفكر في الليبرالية من زاوية تانية
.
ليبرالية .. تنقسم لمقطعين
ليب و تعني شفة .. و .. رالية .. رالي أي سباق .. و التاء للتأنيث
يعني .. وقعتك هباب يا اللي ها تاخد واحدة ليبرالية
.
ها تطلع البلا الازرق على جتتك .. خد في دماغك و هات يا كلام .. ما بتغلبش .. يعني ها تشوفها و هي لابسة .. و ها تخليك تقلع هدومك
و تجري في الظلام
.
تيجي ناخد طريق تاني ؟
قلنا لبرالية تنقسم إلى مقطعين
لب .. و .. رالية
يعني رالي اللب
يعني حضرتك تبقى واقف في المطبخ
ماسك المواعين حتتك بتتك غسل و تلميع
و هي عمالة تقزقز لب
و قشر اللب يا عيني عامل على قفاك اشكال سريالية
..
حد عنده تعريف آخر لليبرالية ؟
..
تحذييير :
فك من الليبرالية فكاكك من التليفزيون الحكومي
.
الثلاثاء، 22 مارس 2011
فسطاط سحس أبي يعقوب .. عليه سحائب الديمقراطية
,
أنا حاطط كلامك
وسايب الناس تحكم
مش هاخبط فيك
كلامك نفسه فيه ما يكفي لكشفك
.
.
ممكن ارجع تاني
..
تمهلي مش منتظر معلومة
المعلومات وفيرة و الحمد لله
..
اللي قالوا نعم يبقوا فسطاط الدين ؟
و اللي قالوا لا .. ؟؟؟
إنت بتفهم يا عم الحاج ؟
..
يا عم الحاج
اللي ما تفهمش فيه .. ما تتكلمش فيه
و واضح انك محتاج تتربي دينيا من تاني
و دا كلام أنا مسئول عنه
.
سؤال مسمم شويه يا عم سحس
انت و امثالك بتهاجموا المسيحيين
ليه ؟
علشان رجال دينهم بيامروهم انهم يلغوا عقلهم
و يتبعوهم
…
هههههههههههههههه
.
سؤال
انت غيرت فلسفتك يا مولانا ؟
لا مؤاخذة
سؤالي دا مبني على كلامك الواضح
عاوز المسلمين .. يقفلوا مخهم و يتبعوك
راجع كلامك تاني يا حجوجة
.
البلد محتاجة تنضف
ديننا واضح يا حجوجة
انت عاوز تدخل الناس زمن الكهنوت ؟
ايه راي فخامتك في الخمسوت ؟
…
جاتكوا القرف
حتى الدين يا مفتريين ؟
!!!!!!
.
الاثنين، 21 مارس 2011
شلشلي يا هنية .. و انا الطم .. كدبة إبريل الآخر
.
اسمع و استمتع
الراجل دا بيشتغل مستشار ازاي ؟
مؤهلاته ايه ؟
و هل سيادته اخد الاعدادية ؟
دا ما بيعرفش يقرا يابا الحاج
و بعدين .. الراجل دا كان بيلعب بالبيضة و الحجر ؟
دا لا عارف يقرا نسب مئوية
و لا عارف فرق بين شهور عربية و ميلادية
يا اخواننا .. حد يلحقني و ينورني
هو شهر ابريل الآخر .. في اي تقويم ؟
عربي ؟ افرنكي ؟ قبطي ؟ سرياني ؟ يولياني ؟ غريغوري ؟
حد ينهضني لاني قربت السع بجد
لما فيه ابريل آخر .. طب ابريل الأول قبله و اللا بعده ؟
انا كدا بصراحة ممكن اشك في المسالة برمتها
اذا كان راجل حط صندوق اسمه ابريل الآخر في السنة الهجرية
يبقى شال قصاده ايه في السنة السودا ؟
ايه النظام الابيض دا ؟
أبيض يا ورد
إلا صحيح
اذا رأس النظام لسانه تيييييييتُ
فكل مستشاريه لا رحتوا و لا جيتوا
اللي يعك العك دا
و يشيل من سنة و تقويم و يحط في تقويم تاني
اصدقه ازااااااي في اعلان نتيجة ؟
الاراجوز كان بيقول ايه ؟
متعودة … داااااااايما
الراجل دا كان متعود فبركة نتايج
و طبعه غلب عليه ؟
حد ينورني يا خلق
.
الأربعاء، 16 مارس 2011
الكل يقف انتباه .. أنا الشعب .. و الكل يبوس إيدي
.
.
الدستور هو وثيقة و عهد بين الحاكم و المحكوم..
يبقى ازاي اوافق على دستور حمضان و ريحته فايحة ؟
ازاي اعطي الحاكم القادم لفافة فيها ديناميت ممكن يدبحني بيها ؟
كله يقف انتبااااااااااه
أنا الشعب
الشعب هو مصدر السلطات
يعني الرئيس ينتظر مني اني اعطيه الحق
و مجلس النواب ينتظر اني اعطيه الحق
يعني
الريس ينتظر
و مجلس النواب ينتظر
ينتظروني انا المواطن اني اعمل عهد و وثيقة حكم جديدة .. احط فيها كل شروطي .. اللي بيها اضمن اني ارفع واحد منهم و اخفضه برأيي بطريق سلمي
مش ها نقعد كل يوم نعمل ثورة .. و مش ها نقعد كل يوم نعطل حياتنا
يبقى
لا و لا و 70 مليار لا لدستور تم ترقيعه مرات و مرات .. و راجعين ينضفوه ..
لا و لا ثم 70 مليار لا لدستور فيه متناقضات .. اربع سنين و اللا ست سنين ؟
و بعدين
لرئيس الجمهورية عمل دستور جديد ..
حرف اللام دا مصيبة
يعني ترجع لمزاج سعادة البيه القادم
يا يعمل يا ما يعملش
لا يا بويا
نشتغل على نضيف و بلاش ترقيع
...
المصييييييبة الكبرى
حقيقي حلقي فيه مرار
لسه الجو فيه غبار شديد
نفس النمط .. نفس الكذب .. نفس الاستهبال و اعتبارنا اغبياء
من مسألة الكنيسة اللي اتهدمت و جابوا اسباب تافهة يضحكوا علينا بيها
و اللا سعادة البيه المستشار اللي بيخوفنا : لو اعترضنا على التعديلات البلد ها تقع في فراغ دستوري
ايه يا عم المستشار ؟ دي الدنيا نهار .. و احنا مش خرعين قوي كدا
و قال ايه : لازم الريس لازم يحلف قدام مجلس النواب و إلا يبقى باطل
يا عم انت و هو
أنا الشعب
أنا اللي الكل لازم ييجي يبوس إيدي
مش عارف امتى ناسنا يفهموا انهم أس السلطات
سلطة مجلس النواب بياخدها من ايدي انا .. أنا المواطن
سلطة رئيس الجمهورية بياخدها من ايدي أنا .. أنا المواطن
أنا المواطن .. أرفع حزب و أنزل حزب
أنا المواطن .. أجيب رئيس و أرمي رئيس في غياهب الإهمال
ازاااااي ؟
بواسطة العقد اللي بيني و بين الدولة
العقد دا اسمه الدستور
يبقى آخد دستور ابن شوارع ؟
و اللا اعمل دستور في النور
يا ليت قومي يعلمون.
.
الثلاثاء، 15 مارس 2011
بدأنا النصب
.
.
.
التصويت على التعديلات الدستورية
( و الموافقة عليها )
واجب شرعي
,
هات لي الدليل يا حاج إخوان على صحة الفتوى دي
دليل من الكتاب و السنة النبوية و الخلفاء الراشدين
و أئمة الاجتهاد و علماء الفقه
.
الانتهازية باسم الدين تبقى ايه يا خلق ؟
.
نظرتي فيكو ما خابتش
.
الأحد، 13 مارس 2011
صاروخ .. متعدد الرؤوس
.
.
يا ليل ما أطولك ..
يا فجر ما أثقلك ..
ما بالها تردد :
هيت لك .. هيت لك ..
يا ليته هلك
.
.
الجمعة، 11 مارس 2011
بلاش مرقعة .. و ارموا المترقع
.
هل هو ترقيع و اللا مرقعة ؟
يا عم خلاص .. هو عود كبريت و اتحرق
عاوزين حاجة بكر بقى
يعني اصوم اصوم .. و افطر على دستور بايت ؟؟ !!
عندنا الخير كتير
و عندنا الخبازين و الطباخين
و الفرن و الكانون شغالين
ليه بقى عاوزينا نمد ايدينا في طبخة بايتة حمضانة ؟
يا عم بلاش مرقعة .. و فضوا الترقيع دا
عاوزين حاجة طازة
.
الأربعاء، 9 مارس 2011
يا خوفي من ستين سنة
.
دماغي قربت تلسع
انا اللي ياما لعبت بمعادلات تفاضلية جزئية
و لاعبت أطراف الكون بهندسات تفاضلية
و حاورت المكونات النووية عبر قرن كامل اللي هو عمرها
و لبست عباءة أبي العلاء و امتشقت سيف عنترة و هدني الدهر بحكمة زهير
ثلاثون حولا و من يعش .. ثلاثين حولا لا أبا لك يسأم
تعلمت العوم في ترعة الفلسفة اليونانية .. و أخدتها شرق و غرب من بغداد لقرطبة
من عند الغزالي ( تهافت الفلاسفة ) لابن رشد القرطبي ( تهافت التهافت )
ركبت قطار الفيزياء و الرياضيات اتنزه في عالم الفلسفة و الفكر
بصيت من نوافذ النور على علوم القرآن و الحديث و الفقه و السير
يعني باختصار : اظن ان انا ممكن اكون مثقف .. احتمال يعني
باحاول دايما ساعة دخولي لموضوع اني ابص بنظرة طائر Bird View استكشف بيها الموضوع و احدد مساراته الواسعة .. و بعد كدا ابقى ادخل في التفاصيل و السكك الفرعية و الحواري .. لغاية ما اوصل لديل الموضوع .. زنقة زنقة
.
انا قلت رأيي قبل كدا
الضباط بتوع انقلاب يوليو .. كانوا إفراز الإخوان
اللي انا شايفه .. انه حصل طلاق بائن بين الضباط و الإخوان
الطلقة الأولى كانت بعد حادث المنشية في الخمسينيات
الطلقة التانية كانت في الستينيات
قام اييييه .. النظام رجع العلاقة في ايام بابا أنور .. بس عرفي .. كدا و كدا يعني .. بدون ما يروحوا للمأذون
قام إييييه .. بعد ما العلاقة وصلت لهجر سراير في أيام بابا حسني .. و النظام سماها المحظورة .. و تم الطلاق .. و بانت المحظورة عن النظام بينونة كبرى لا رجعة فيها
المحظورة بقى .. كانت كارت إرهاب في إيد النظام ..
كل شويه يقول لك : أهوه .. لو مشينا .. الإخوان جاهزين
( ما اعرفش ليه هيلاري بتلعب لي شنبها و بتفكرني بكلينتون و مونيكا )
مات النظام .. و باقي ابن عمه .. بيغازل طليقة المرحوم
و الظاهر نفس العيلة مخها متركب نفس التركيب
..
أنا شايف ان نفس الأسلوب هو اللي ماشي
ما فيش فرق بين اللي اتعلموا في ليسيه الحرية و اللي اتعلموا في المدرسة الألمانية و اللي اتعلموا في مدرسة فيكتوريا و اللي اتعلموا في كتاب سيدنا الشيخ عبد الموجود .. و خلي بتوع قلة التربية و التهبيل على جنب
يا ترى ايه السبب ؟
هل الفيروس المباركي أصاب الكل و مالهوش دوا ؟
الكل بيقول نخلي انتخابات البرلمان للآخر .. يقول لك لأ .. اول حاجة تبقى انتخابات البرلمان
طب يا اخواننا .. نعمل دستور جديد و بلاش الترقيع .. يقول لك لأ .. و مين يوافق و مين يحلف و مين و مين …
يا عم الحاج .. احنا في مرحلة شرعية ثورية .. اسقطت نظام و مواثيقة اللي كانت بتربطه بالشعب .. و على كدا يبقى نحط مبادئ دستورية .. و يتعمل مجلس رئاسي من مجموعة مدنيين مع واحد من العسكريين .. و نبدأ نعمل قانون أحزاب بمعايير أنضف .. تلاقي فجأة الكلام اتنقل من عند دكانة زينب القرعة في شبرا و تلاقيه بيبص لك من غرزة عنايات العمشة في نزلة السمان
شفيق يا راجل .. من مرحلة ما اعرفش .. لمرحلة ادونا فرصة .. لمرحلة .. لمرحلة .. و أول ما ركب الناقة و شرخ .. بدأ جهاز قمل الدولة يفلسع .. الله .. طب حد يفهمني يا جدعان .. ايه الروابط السرية ؟
أنا حاسس انه فيه تلميع للمحظورة
هل التلميع دا تلقائي و عادي ؟
و اللا تلميع مقصود بيه الحرق ؟
و اللا تلميع مقصود بيه التفاف و حرق ؟
و اللا .. و اللا .. و اللا ؟
يا ترى اللي اتحقق من طلبات الثوار بيمثل كام في الميه ؟
ما مدى سهولة مشوار العودة ؟
يا خوفي ندخل نفق ستين سنة جاية استكمالا لستين فاتوا
.
الأحد، 27 فبراير 2011
شهادة مختومة بحافر تور أحمر
.
العوج عمره ما ينعدل
و لو علقت فيه قالب
..
.
اقتراح
لا لا لا لا لا
دي شكلها لازم تيجي بالدراع
…
إحالة كل ضباط الداخلية اللي فوق 40 سنة للتقاعد
من سن 35 إلى سن 40 سنة .. يتغربلوا
اللي ينفع يرجع بني آدم .. يتم إعادة تأهيله
اللي ما ينفعش .. يحصل اخواته في سرداب التقاعد
تحت سن 35 يبدأوا تربيتهم من جديد
شروط الالتحاق بكلية الشرطة
لازم ينضاف لها شرط أساسي
اللي يتقدم لكلية الشرطة
لازم يثبت أنه بني آدم
يجيب شهادة من اتنين موظفين عطشجية في زريبة البيه
مختومة بختم حافر تور أحمر
.
جاتكواااااا القرف
قرفتونا في حياتنا يا جدع
.
الخميس، 24 فبراير 2011
يا هنية .. روزا ع الكرسي و انا وراها
।
حلمي بيكبر اكون الريس
…
نظرة ف تواريخ الرؤساء
…
الأول .. أخواله سودان ..و يا عيني حبسوه
…
و التاني .. حرمه إيرانية .. لأ و شيعية ..
و الأغرب .. قالوا بهائية
رفعوه ع الكتف و عبدوه
و التالت .. حماته يا عربي انجليزية
و الرابع ... شرحه يا عجمية
...
فتش كواليس الماسونية
يا خراب يا ولاه
...
الفولة مفهومة يا افندية ؟؟ !!
..
ما تهدي النار ع التقلية
...
هات لك كوساية كندية
لأه ..
أمريكانية
كدا تضمن كرسي و تكية
قصر الرئاسة أكيد ليا
تربتتااااااااه
..
هاهاها هاااااااااااا
..
القصة مش ابويا و أمي
أو خالي و عمي
أو مصر الغالية تكون همي
أو ميه الميه يكون دمي
..
القصة ... صخرة على فهمي
حاسس بكآبة .. زايد غمي
اطلع كرسيا و ف إديا ..
البت هنية
أو روزا الشقرا و ابيع دمي ؟
…
يا وجعي .. و آآآآآآآآآآآآآآآآآآه
.
الأربعاء، 16 فبراير 2011
وجهة نظر .. روح عهد جديد ..
.
عندك مظلمة ؟
احنا بقينا في عهد جديد
عهد مصارحة و مكاشفة
ارجو ان احنا نرتقي فوق الغوغائية
انت شغال في بنك ؟
شغال في شركة ؟
شغال في مصلحة حكومية ؟
عندك مظلمة معينة ؟
و اكيد .. كتييييييير في نفس المكان .. عندهم مظالم
تعالوا بينا نتعلم النظام و نتعلم الحوار
ليه نخلي التظاهر اول الحلول ؟
اقترح
اتجمعوا بعد انتهاء العمل .. و اتناقشوا
حددوا المظالم
حددوا المطالب و الحلول
اختاروا ممثلين لكم يطالبوا المسئول
لو المسئول وافق .. فبها و نعمت
لو ما وافقش .. تروح مجموعة تانية
وافق .. اهلا و سهلا
ما وافقش .. يبقى فيه مستوى اعلى نخاطبه
..
ما فيش حلول
ابقى اعمل مظاهرة
..
رأيكوا اييييييييييييييييه ؟
..
الجمعة، 11 فبراير 2011
مبرووووووووووووووووووك لكرامة الإنسان المصري
.
ياااااااااااااااااااااااااااااه
أخيرا فهمت ؟
الحمد لله
كدا ممكن الدنيا تبقى نور ؟
أحمدك يا رب
.
يا زمن فيفي عبده .. امتى اشوف نهايتك ؟
.
لسه متمسك بزمن فيفي عبده ؟
.
انت اييييييه ؟؟ فيفي عبده ؟؟ !!!
.
يخرب بيت كدا
.
الثلاثاء، 8 فبراير 2011
هنا قناة : لا و النبي يا عبده .. بنت موجة : هشك بشك
.
أيام كنا صغارا
كنا إذا اضطجع المساء .. على رموش ليل انتحر فيه القمر
و دخلت محولات الكهرباء في غيبوبة
كنا
كنا نلتف في باحة الدار حول الكبار
و تبدأ خيالات و أطياف تسحر النفس بفعل حكايات الماضي
كنا نحلق في الخيال .. و ننكمش في أجسامنا الصغيرة
و لم لا ؟
سمعنا عن حكايات النداهة .. التي تتشكل بشكل الإنسان .. و لكنها ذات أرجل معيزية .. و ما أبرعه من يطعنها بالمسلة كي تتحول حمارا يستعبده طول الليل في أشق الأعمال.
.
سمعنا عن بنت البحر ( الجنية ) ذات العينين الطوليتين .. و التي تفح نارا حامية على من يقترب منها .. و كيف أنها كانت تخرج إلى شاطئ النهر تحت الشجرة في عز الظهر تفرد شعرها الطويل تمشطه بمشط صنع من حديد
.
سمعنا عن مغامرات مع الذئاب في حكايات تفزع القلوب .. و بعضها كان طريفا ينتزع منا الضحك رغما عن جو الرهبة الذي نعيشه
.
حكايات .. و حكايات
.
حكاية الغريق الذي كان في جوال ملئ بثمار الفلفل و الخيار .. جاء من بلدة بعيدة عن قريتنا .. فأخرجوا جثته .. و كانت لهم مقولة : ( البر البر .. يا طالب الدفن ) ..
حكاية الغريب الذي قصد قريتنا و استطاب له هواؤها .. فقرر الإقامة فيها .. عاش وحيدا .. لا .. لم يكن وحيدا .. فإنه كان متزوجا من جنية
و حكايات و حكايات
من أطرف الحكايات التي سمعتها صغيرا في هكذا ليالي
حكاية الجاسوسة الإسرائيلية
التهب خيالي بسماع تلك الحكاية ..
حكى الراوي أنه : كان ياما كان .. يا سعد يا إكرام .. و لا يحلى الكلام إلا بذكر النبي عليه الصلاة و السلام
قامت المخابرات المصرية التعيسة .. أظنها كانت تعيسة في تلك الأيام بعد النكسة .. قامت بالقبض على جاسوسة إسرائيلية
ما حكايتها ؟
قال الراوي .. انتشرت شائعة شديدة بين الناس تحذر من أكل البطيخ ..
لماذا يا أهل الخير ؟
يقال أنه كانت هناك امرأة جميلة جدا تسيح بين مدن الإقليم .. تدور على باعة البطيخ .. تشتري البطيخ بمبلغ مجز .. ثم تحقنه بشئ غريب .. ثم تعيد البطيخ إلى البائع مرة أخرى .. ثم تمضي .. يشتري الناس البطيخ .. يأكلونه و يموتون
انتشرت الشائعة
و شحذ رجال المخابرات هممهم .. و راقبوا باعة البطيخ .. إلى أن رأوا تلك الحسناء .. الجاسوسة الإسرائيلية
قبضوا عليها
و كانت المفاجأة
أثناء تفتيشها .. وجدوا أنها تلبس تحت فستانها بدلة ضابط إسرائيلي
و بهذا عرفوا أنها إسرائيلية
و حكموا عليها بالإعدام
.
ما أقرب ما نسمعه اليوم عبر شاشات قنواتنا التليفزيونية التعيسه و ما حكاه لنا عواجيزنا
.
نسمع الآن عن أساطير كنتاكي .. و تغلغل حزب الله في الرئة المصرية .. و انتشار الجنيات الغربيات في مجتمعنا ..
نسمع عن وجود 2 مليون في التحرير ضد النظام .. ( لكن باقي الــ 85 مليون مع النظام )
ألم يخرج المصريون جميعهم .. جميعهم .. و حققوا انقلاب 1952 ؟؟ !!!
الأغبياء لم يسمعوا عن شئ اسمه النخبة و الرواد و القادة
..
يا طالع الشجرة
هات لي معاك بقرة
تحلب و تسقيني
بالمعلقة الصيني
..
ما زال في جيبي حكاية
سأرجئها للمرة القادمة
إن أمهلني القدر
.
الأحد، 6 فبراير 2011
جينز و تي شرت .. و خيمة
.
يا حجاجنا
الله يصلح حالكوا
ما بلاش قعدة الصالونات دي
انزل يابا الحاج انت و هو ع التحرير
انصبوا خيمة في الهواء الطلق
علشان الكلام يكون مبحبح
و افتحوا الحوار مع (كل واحد ) من الشباب
كله يلبس جينز ( اللي ما باحبهوش ) و تي شرت
و اللي عاوز عناب و اللي قهوة سادة و اللي عاوز يخمسن
الواد بلية عنده اوامر يكون في الخدمة
كان نفسي اكون معاكو
بس منهم لله اللي كانوا السبب
.
السبت، 5 فبراير 2011
ايه آخرة العهر دا ؟
.
أشتاتا أشتووووووت
كتكووووووت .. كتكوت
افتح لا يموووت
…
قال اييييييه .. خير و الصلاة على النبي
الاعلام المصري .. علشان هو اللي ربانا .. لسه فاكر ان احنا لسه منتظرين الرضعة .. مش عارف ان احنا اتفطمنا من زمان
…
إعلام مصر
بلد الريادة
و تاريخ 7000 سنة
لسه مصر انه يقلل من قيمة البلد و قيمة اولادها
بقى له كام يوم .. بيتحفنا بمعلومات خطيرة جدا
..
ويكيليكس : قطر تستخدم الجزيره لضرب استقرار مصر بالتعاون مع اسرائيل
…
ويكيليكس : وزير الخارجية القطرى الشيخ جاسم وعد عددا من المسئولين الإسرائيليين والأمريكان أنه بمجرد خروج المصريين إلى الشارع فإنه سيكلف قناة الجزيرة ببث كل ما يشعل الفتنه فى الشارع ليس فقط بين المصريين والنظام ولكن بين المصريين بعضهم البعض
…
شاهت الوجوه
تبا لكم و لكل هازل هزيل الفكر ساذج
يا عالم يا هوووووه .. بطلوا عهر بقى
وجينا من الغباء بتاعكو
لييييه بتصغروا بلدنا بالشكل دا ؟
…
دا اعلامنا المصري نفسه .. هو اللي في يوم و بكل سخرية منفرة .. كان بيستصغر الحتة قطر و بيقول : قطر دي يااااا دوووووب زي سكان فندق في إحدى ضواحي القاهرة
و قالوا : قطر دي عبارة عن قناة طلعت لها دولة
…
يا ناس عيب .. يا ناس اتسموا على بدنكم بقى
حاولوا تفهموا معنى الكلام اللي بتقولوه قبل ما تحدفوه زي الطوب
..
ازاي يا بلد الريادة .. يا دولة المحور .. يا دولة الحضارة و 7000 سنة .. ازاي تتهزوا من حتة قطر ؟
دي قطر عندها حتة قناة
و انتوا عندكو خمسين قناة
لما حتة ( الجزيرة ) ترعبكوا بالشكل دا .. تبقوا اييييييه ؟
امتى ؟ امتى ؟ امتى نلاقي ناس عندها فهم هي اللي بتخاطبنا
إلى متى سيظل في مقدمة صفوفنا المعوقون ذهنيا و ذووا العهر الثقافي و السياسي و الاقتصادي و .. و .. و ؟
جاتكو خييييبة
..
واااااااد يا بلية
خلي صبيان الورشة يخبطوا غطيان الحلل النحاس .. دي موسيقى واقعية للموقف اللي احنا فيه
اتقرفنا من السوفت ميوزيك بتاع التليفزيون المصري
.
الأربعاء، 2 فبراير 2011
ارجع لورا يا حزن يا وطني
.
التعديلات
..
اظن يعني تبقى بجاحة لو فتحي سرور مد ايده في التعديلات
اظن تبقى رعونة لو صفوت الشريف ادلى برأيه
اظن تبقى مصيبة لو الحزن الوطني تعامل مع التعديلات
المصايب اللي حصلت كانت بايد النظام
يبقى ازاي نطلب حق الوطن من ايد ناس هي اللي عكرت صفو الوطن ؟؟
..
التعديلات لازم تكون بايد وطنيين من خارج المؤسسات اللي قامت ضدها المظاهرات
عاوزين ناس تكون من خارج الأحزان كلها
و يؤخذ رأي حزب واحد بس .. حزب 25 يناير
ممكن حد يقول لي : انت دكتاتور
ليه ؟
احنا سيبنا الوضع لهم سنيييين .. و عكروها
يسيبوها بقى .. و خلينا ننضفها
و ليه تعديل مواد ؟
عاوزين دستور جدييييييييييد
…
ليه وسائل الاعلام الحكومية بتميل للحزن الوطني ؟ و الاحزان التانية مش واخده حقها ؟
ليه الحزن الوطني له مقار عامة ؟ و الاحزان الاخرى بتدفع من جيبها ؟
مش برضه الحزن الوطني لازم يرجع يقعد في المقاعد الخلفية بعد خيبته القوية ؟
ليه اللي ينتقد الحزن الوطني يتهم انه مش وطني ؟ مع ان احمد عز حزن وطني
بان معدنك يا وطني في ظروف الانتفاض الوطني
…..
مش عارف اناااااااااااااااااااااااااااااااااااام
عاوز آآآآآآآآآكل فسييييييييخ
.
العيال كبرت يا رمضان
.
يا ترى
مصير رجالة ميدان التحرير ايه ؟
اعتقالات ؟ .. ملفات في أمن الدولة ؟ تشريد و تنكيل ؟
طب ما مدى مصداقية الداخلية كلها بعد موقفها الندل ؟
الداخلية سقطت بامتياز مع مخدة القرف
..
انا رجعت اللي في بطني مرات كتيرة الايام اللي فاتت
ليه النظام بيأوي الكدابين و المنافقين و القرود ؟
رموز كبيرة الحجم خاوية المعنى لسه بتكدب علينا
هل يا ترى لأنهم مش فاهمين اللي بيقولوه و اللا بيعتبرونا سذج ؟
..
انا شفت الفرق الضخم ما بين شباب النانو تكنولوجي و كدابين العصر النحاسي
للاسف .. الدولة بكل امكانياتها .. و الخبرات بتاعتها .. كانت اقل بكتير من جماعة شباب ليس لهم قيادة إلا مبدأ كان بيربط بين قلوبهم و عقولهم
نظرهم بهت ما عادوش بيشوفوا كويس .. و حركتهم تقيلة في عصر الفيمتو
و فوق كدا و كدا .. نظرتهم الاستهتارية لجيل الشباب .. اللي اظهر لهم قدرته اللي فاقت قدراتهم بكتير
.
امتى الاقي وزراء في سن 35 سنة ؟ و رئيس في نفس السن
رئيس شاب لدولة تحكمها مؤسسات .. تتقدم له النصايح من مجلس حكماء و مستشارين
..
كل الموجودين في سدة الحكم الوقتي عايشين بافكار العصر الخشبي
ما ينفعوش في عصر Tunneling Protocol .. عصر انفاق الشبكات
ما عادتش انفاق رفح .. لا .. دي انفاق تخليك تلف العالم في ممرات الانترنت
مش كفايه كدا على جيل الأجداد ؟
ليه مش عندهم تقدير لقدرات شباب العصر ؟
..
لامتى ها نفضل نكدب على نفسنا ؟
مظاهرة مليونية في ميدان التحرير .. و شرذمة عند مبنى التليفزيون
ليه التقليل من شأن المظاهرة المليونية ؟ و تضخيم لعبة الشرذمة ؟
طب كانت فين الشرذمة اللي طالعة تهتف للريس .. من اسبوع فات ؟
ليه يتهم البرادعي لما كلم السفيرة الامريكية بانه بيحمل اجندة امريكية و لم يتهم رئيس الاركان اللي لسه جاي من امريكا من كام يوم ؟ و ليه ما بيتهمش الرئيس مع انه اكتر المصريين تعاملا مع الامريكان ؟
يا ناااااااااااااااس
حاولوا تفهموا المسائل .. و تمنهجوا النقاشات بتاعتكو
ليه اللي ينتقد الريس يبقى خاين ؟ طب و اللي يتملق الريس ؟ مش اشد خيانة ؟
ليه يتهم البرادعي بانه سبب ضرب العراق ؟
ايوه .. اصل البرادعي هو اللي دخل الجيش العراقي للكويت
و هو اللي طلب قوات امريكية تدخل الخليج
و هو اللي صرح بعبور الجيوش الامريكية لقناة السويس
و هو اللي تحالف مع الامريكان ضد العراق
و هو اللي كتب تقارير المخابرات البريطانية و الامريكية الكاذبة اللي قالت انه العراق فيه اسلحة دمار شامل .. مع ان العراق كانت مفتوووووووحة للتفتيش حتى غرف نوم الرئيس
.
ليه لما بنيجي نحكم بنمسك زاوية واحدة ؟ و بنردد ترديد ببغاوات لكلام كدابين ؟ و بنلوي اعناق الحقايق للوصول لنتايج مفروضة و لو حتى بالكدب ؟
…
اي نعم .. انا باتهم اعلامنا انه بيضللنا .. و غير عادل في تناول الحقايق
و للاسف .. شفت قرود رقصت .. ذات اليمين و ذات اليسار .. و على واحدة و ربع
اصل .. لا مؤاخذة .. الواحدة و نص .. تبقى بتاع رقاصة .. رقصت في الشارع .. في افتتاح اوكازيون التحرش الجنسي في الشارع المصري
و للاسف .. الداخلية و قانون الطوارئ .. تحرشت بالشعب .. بدل ما تحميه من افعال فاضحة في الطريق العام
..
واحد قسيس سال سؤال .. انا باهديه للزمارين و الطبالين
ليه لم يتم الاعتداء على كنيسة واحدة في غياب الامن ؟
Hint : مين اللي كان بيعطي الاوامر لضرب الكنايس ؟ و لمصلحة مين ؟
شغل مخك يا جدع
..
شباب المتظاهرين .. اسقط ورقة التوت عن سوءة نظام بيهين المواطن بحجة مصلحة الوطن .. و التجربة العملية اثبتت ان احنا عاوزين الوطن بدون وصاية
العيال كبرت يا رمضان
..
دبابيس
الاخوان .. افرزوا نظام 1952 .. يعني اللي عاوز يدفن 52 يبقى لازم يصحى للي افرزوه
..
الحزن الوطني و كافة الاحزان الاخرى .. اثبتت انها اقل بكتير من حمل مسئولية مصر
…
من حق شباب 25 يناير التربع على كرسي السلطة .. و واجب على السلطة الحالية ان تتنحى جانبا في الظل و تعطي الفرصة لهذا الامل الواعد ..
قلنا العيال كبرت يا رمضان
..
واحد ها يقول : دول شوية عيال .. و بعدين فين خبرتهم ؟
إدارة الازمة الاسبوع اللي فات .. بتثبت انهم اعلى قامة
لما يكونوا بدون خبرة و يكون دا الاداء بتاعهم .. يبقوا احسن من اهل الخبرة اللي رسبوا في الامتحان
.
لا برادعي و لا غيره .. شباب التحرير ما فيش غيره
.
حزب 25 يناير .. تحت التأسيس
دي فكرة
هل ممكن تبقى واقع ؟
هل ممكن يكون رئيس مصر القادم شاب من الحزب دا ؟
..
بفكرتي دي .. ممكن واحد يتهمني بالعمالة لقناة الجزيرة
زعلانين ليه من قناة الجزيرة ؟
علشان فضحت زبانية أبي لهب اللي سلطوا خراطيم المياه على جموع المصلين على كوبري قصر النيل ؟
علشان فضحت فعل زبانية أبي لهب بدوس المتظاهرين بالمصفحات ؟
فضلا عن اطلاق الرصاص المطاطي و قنابل الغاز المسيل للدموع
.
ما تصحوا يا خلق ؟
.
انا مش منتمي لحزب
و كنت اميل للتيار الديني
لكن .. لكوني واخدها كحت من اليمين لليسار قراءة و استيعاب لكل الاطياف
انا بانادي .. لانشاء حزب جديد
حزب 25 يناير
يحمل روح و فعالية و مبادئ شباب 25 يناير
اكون العضو رقم واحد
مش بالضرورة اكون رئيسه
لكن يكون لي شرف الانتماء له
..
انا موعود ان دماغي تلسع بعد تاني وردية ليل
اقوم اناااااااااااااام .. بقى لي اسبوع و نص بانام ساعة واحدة في اليوم
.
الاشتراك في:
الرسائل (Atom)
