.
مرة واحد من الفلاسفة قال :
قل كلمتك .. و امش
ممكن الكلمة دي .. ما تلاقيش حد يسمعها في وقتها
لكن .. احتمال تتسمع بعد عمرين طوال
و احتمال مفعولها يبدأ بعد قرن من الزمان
المهم .. انك تقول كلمتك .. و تتكل على الله
و تمشي
..
هل تحب تبقى قطر و اللا بسكليته ؟؟
و ليه ؟
و ايه مزايا و عيوب الانسان القطر ؟؟
و ايه مزايا و عيوب الانسان البسكليته ؟؟
خد لك وردة
.
.
فيه ايه بعد كدا ؟
ممكن يكون دا ؟
و اللا دا ؟؟
أو
ممكن دا ؟
استرها يا رب
.
.
اقدر أقووووول ان البرادعي اتحرق .. و احتمال يكون وصل لمرحلة التفحم
دا كان موجز الأنباء
التفاصيل .. ربما تأتي بعد قليل
أو احتمال تتبخر قبل ما توصل صفحات المدونة
.
اللغز هو .. ماكوندو
اقرأ تاريخ ماكوندو .. تقوم تعرف اصل و مستقبل اللعبة
يقف على رأس قافلة أدباء أمريكا اللاتينية الأديب العالمي غابرييل غارسيا ماركيز
الراجل دا اخد نوبل في الادب ايام ما انا اخدت نوبل في اكل البسكويت
اقرا خريف البطريق و مئة عام من العزلة و لا أحد يكاتب الكولونيل على سبيل المثال
في خريف البطريق عبارة تساوي تقلها دهب في تشريح الانظمة الدهرية
( أمة بلا عظماء .. أمة بلا تاريخ ) عبارة لها امثلة اوضح من الشمس
العبارة على فكرة بتضرب في مقتل .. مش زي ما ممكن تتصور لاول وهلة
المهم
الواحد لما بيبص كدا على شط تاريخ منطقتنا العربية بييجي له اكتئاب
الحكم حتى الموت
الموت .. او القتل .. او السجن .. او النفي
القتل في سبيل الحكم .. دي علامة مميزة جدا في تاريخنا العربي
تنتهي حقبة و تبدأ حقبة باعتلاء ظهور الخيل و قعقعة السيوف .. أو دس السم
في تاريخنا العربي نماذج لناس حكمت سنين طويلة و هي في حكم الموتى
..
نروح بقى للشعوب
الشعوب بقى ناااااايمة .. او واكلين شكولاته مسمومة
شعوب يحكمها عبيد .. ما يضرش
يحكمها اغوات .. ما يضرش
يحكمها ناس تبدل دينها .. يا راجل طنش
يحكمها اللي يضربهم بالصرمة .. آهي صرمة تفوت و لا حد يموت
.
الناس يصنعون فراعينهم
العبارة دي انا قلتها بعد اكتر من تجربة انسانية شفتها بعيني
اكتر الناس بتميل طواعية الى تأليه المسئول و فرعنته .. بدون طلب منه
...
ننط بقى على حالة عجيبة غريبة
ما اعرفش انا اللي فاهم غلط و اللا ايه الحكاية
الاخوان كانوا جماعة لها ايدلوجية معينة
كانوا عاوزين يوصلوا للحكم
يبقى لازم يكون لها درع و سيف
قام اييييه .. واخدين المقاطيع الضباط الاحرار بالحضن
الضباط ها يوصلوهم للحكم
قام ايييه .. المقدم جمال بيه عبد الناصر مقطعهم حتت
عاوز افهم بقى
ليه الاخوان بيشتكوا من ظلم العسكر ؟؟؟
مع انهم كانوا معاهم يدا واحدة
الطمع قل ما جمع
.
عسكري شطرنج
قراءة التاريخ العربي الرسمي تخلي الواحد يكره نفسه
لان اللي بيكتبوه بيسبحوا بحمد اللي فرعنوه
علشان كدا .. انا باقرا التاريخ بطريقتي الخاصة
انا عن نفسي باعتبر المقدم عبد الناصر و زمرته عسكري شطرنج
زيه زي حامد قرضاي .. و اياد علاوي .. و لوران كابيلا
لما تسمع عن لوران كابيلا .. فتش عن الألماس
الامبراطورية الامريكية لعبت بعساكر شطرنج كتير
...
ندخل في خبر البرادعي اللي اتحرق
قلنا ايه ؟ المسبحين بحمد اللي بيفرعنوه كتير جدا و متطوعين يعملوا بدون طلب
اونكل برادعي .. دا راجل رومانسي جدا
جاي على جناح فراشة بفلسفة رومانسية حالمة
جاي يعمل ايه ؟؟؟
بيطالب بالتغيير
الراجل دا عبيط و اللا بيستعبط ؟؟
هل اللي جاي يغيرهم ها يسيبوه يغيرهم ؟
هل اللي جاي يغير علشان خاطرهم ها يقفوا معاه ؟
انا ليا راي سلبي جدا جدا جدا في مسالة التغيير دي
مش معنى دا اني رافض التغيير
نو نو نو نو نوووووو .. دا انا نفسي التغيير يبقى الوقتي و حالا
لكن .. ابقى قابلني
الواد بلية .. كان معايا ع المسنجر
اعطاني رابط الجمعية الوطنية للتغيير .. و قال لي انه فقع صوت بيايد فيه اونكل برادعي
انتهى الحوار بان الواد حصل له اكتئاب من كلامي له
انا عاوز اتجوز و اجيب عيال و اربيهم .. بلا برادعي بلا سروجي
المهم
الفترة اللي فاتت .. كنت مشغول لشوشتي في كورس تدريبي
دكتور ديفيد و دكتور آشلي كانوا واخدينا مقاولة يوميا من تمانية صباحا لتلاتة ظهرا
4 محاضرات يوميا لغاية ما نسوا الواحد الزنباع وين ينباع
لما اتفك اسرنا .. الواحد انطلق ع البحر
بعد كدا .. عدنا للحياة العادية من تاني
امبارح بقى .. قلت ناقصك حاجة يا اسطى .. ناقصك ايه ؟
اااه .. ايوه صح .. شوية صياعة
صياعة الاسطى بين ارفف المكتبات
المهم .. عيني وقعت على ايييييه ؟
مجلة روزاليوسف
الغلاف عليه صورة شكلها قبيح لاونكل برادعي و الريسة سلمى
العنوان بيقول : مقارنة بين الريس محمد و الرئيسة سلمى
عنوان تاني : شهادة من عالم مصري كبير في الطاقة الذرية :
البرادعي كان العقبة الاولى امام تطور البحث النووي في مصر
قلت على طول : البرادعي اتحرق يا رجالة
قلنا ايييه ؟ تطوعا .. هناك من الجحوش من يفعلون ما لم يطلبه اللي فرعنوه
دخلت النت و شفت فلم الريسة شريهان .. ظريفة الريسة
قوووم ايييه ؟ عملوا مقارنة بين الريس و الريسة
الراجل في البداية .. اتهموه انه دسيسة امريكاني
لقوا انه مش كل مرة الناس ها تصدق زي ما صدقوا ايام ايمن ظلام
دخلوا بقى في البرجوازية و قصر في فرنسا
يا اولاد القديمة .. يعني الراجل ها ييجي عينه مليانه .. ممكن يطلع من جيبه و يعطي
يعني ممكن يغير الماسورة المكسورة
بيقول لك بقى .. البرادعي بتنقصه الخبرة السياسية
اي نعم .. تنقصه الخبرة السياسية بالمعدل المصري الجنرالي
المهم
الماكينة الاعلامية شكلها شغالة لحرق الراجل
نروح خطوة للامام
لا البرادعي و لا غيره
الدسطور .. دسطور يا اسيادنا .. قطع الميه و النور
اللي مش عاجبه .. قدامه حل من اتنين
انقلاب عسكري .. او .. الثورة الفرنسية
و كلاهما اضغاث احلام
..
انا عاوز اوصل بس لعالم الذرة
بيقول ان البرادعي كان العقبة الاولى امام تطور البحث النووي في مصر
و علشان البيه استاذ كبييير في هندزة اسكنجرية ..
انا عاوز اقدم له تحية اسكنجراني تعمل زلزال في الكرة الارضية
تقوم الكورة الارضية تنضف من النفاق الفج دا
ما تصحى يا دكتوووور
اللي قيد الذري و النووي و العسكري و الاخلاقي كان البيه المقدم
المقدم عبده هو اللي وقع على معاهدة انتشار الاسلحة النووية
و المقدم هو اللي فقرنا بحروب ما كانش لها لزوم بالمرة
النووي قرار سيادي يا عم الحاج
باكستان هناك اهيه .. عندها النووي .. و عندها عالم قامته كانت اعلى من رئيس الوزراء
العالم دا راحت هيبته ايام العسكري برويز مشرف .. و دخل السجن لاجل عيون الامريكان
فهمت يا عم الحاج و اللا اقول كمان ؟؟؟
العالم الباكستاني .. علشان يسرق سر النووي .. اشتغل فراش
..
انا نمت و صحيت و نمت و صحيت و اتغديت و نمت
و كنت كل شويه اكتب اي حاجة تيجي في بالي
فلو الكلام مش مربوط ببعضه .. كل واحد يربطه بطريقته
انا ناوي اتجوز واحدة فيها عرق اجنبي
لاني بافكر .. بعد عمرين طوال .. اكون الريس
ريس مركب في اعالي البحار
اقوم انااام ؟؟؟؟
يا عم انا زهقت من الكتابة .. روووووح
كفاية كدا
.
.
أمي .. ليرحمك الله
اللهـــم .. اغفر لها و أرحمها و اعف عنها
و أكرم نزلها و وسع مدخلها و اغسلها بالماء و الثلج و البرد
و نقها من الذنوب و الخطايا كما ينقي الثوب الأبيض من الدنس
اللهـــم .. أنزل على قبرها الضياء و النور و الفسحة و السرور
اللهــــم .. أبدلها داراً خيراً من دارها و أهلاً خيراً من أهلها
و أدخلها الجنة و أعذها من عذاب القبر و من عذاب النار
اللهــــم .. اجزها عن الإحسان إحساناً ، و عن الإساءة عفواً و غفراناً
اللهــــم .. آنسها في وحدتها ، و آنسها في وحشتها ، و آنسها في غربتها
اللهــــم .. أنزلها منزلاً مباركاً و أنت خير المنزلين
اللهــــم .. أنزلها منازل الصديقين و الشهداء و الصالحين و حسن أولئك رفيقاً
اللهــــم .. اجعل قبرها روضة من رياض الجنة ، و لا تجعله حفرة من حفر النار
اللهــــم .. افسح لها في قبرها ما بين المشرق و المغرب ، و انقلها من ضيق اللحود إلى جنات الخلود
اللهــــم .. قِهِا السيئات (وَ مَن تَقِ السَّيِّئَاتِ يَوْمَئِذٍ فَقَدْ رَحِمْتَهُ )
اللهــــم .. اغفر لنا و لها ولجميع المؤمنين والمؤمنات والمسلمين والمسلمات الأحياء منهم والأموات يا رب العالمين
.
.
دا بقى و بلا فخر
الاسطى احمد الكهربائي
…
…
بيقولوا لواحد :
بقى الواد الاسطى احمد الكهربائي .. يعلق البت بتاعتك ؟؟ !!
رد عليهم بكل اعتداد :
و مين اللي قال لكم .. انه اسطى او كهربائي ؟
لعلمكوا بقى
هو لا اسطى و لا كهربائي .. و لا بيفهم في الكهربا خاااالص
قال كهربائي قال
ياخي يوه يوه يوه
.
