ليه بيخطفوا حلم غيرهم ؟ ..

 

 

 

 

أول مرة تحب يا قلبي

 

حبيبها  ..  لست وحدك حبيبها .. حبيبها أنا قبلك

 

 

شعر راسي وقف زي المسامير ...  و وصلت حرارة دمي درجة الغليان  ..  و دقات قلبي كانت زي الطبل في مارش عسكري

 

كل دا  كان ليه   ؟    ..   لما سمعت اغنية  حبيبها  ..  كنت  على وشك  دخول تانية اعدادي  ..  اخدتني كلمات القصيدة  و صورها و تشبيهاتها  ..  الصور الدامية فيها   غرقت  احاسيسي  في بركة اكتئاب

 

بعدها  .. لقيتني  باتشد  اكتر  للقصائد  المغناة   ..  شدتني قصيدة تانية  ..  لنفس الشاعر  و نفس المطرب  ..  اسم القصيدة  ..  لست قلبي 

 

 

أنت قلبي ..  فلا تخف و أجب  ..  هل تحبها  ؟؟؟؟

 

طبعا  ..  بعد كدا  .. لما اشتريت ديوان ( لا تكذبي )  للشاعر  كامل الشناوي  و قريت القصايد بتاعته  .. و كنت وقتها في  المرحلة الثانوية  ..  و لقيت فيه القصيدتين  ..  حبيبها  .. و  ..  لست قلبي  ..  كان ليها  طعم تاني

 

المهم

 

 

مين فينا في مرحلة المراهقة   ما حبش  اغاني عبد الحليم   ؟   رومانسية و ناعمة   و بتدغدغ المشاعر

 

انا باعترف  و بمحض ارادتي  .. انه  عندي  داء  اسمه داء التميز  ..  و ممكن نسميه  داء الكلكعة ..

 

يعني ايه  ؟

 

يعني مثلا مثلا   ..  كنت اكره الحاجة المشهورة قوي  و اللي بتتكرر على السنة العامة  ..  يعني  ..  كرهت اغاني  جميلة و مشهورة لمطربين كويسين  .. لاني كنت بالاقي  ناس بتسمعها في شرايط  ..  ناس  باعتبر   اني لازم  اكون مختلف عنهم

 

كنت على العكس من كدا  ..  ادور ع الحاجات الصعبة  اللي مش اي حد يفهمها   و اقعد  لها بالمرصاد 

 

غير كدا  ..  كنت  باتلذذ   باني  العب بالمواد  الصعبة اللي معقدة البني آدمين  ..  و ارمي المواد  السهلة  ما ابصش فيها 

 

 

يعني مثلا  ..  النحو   من المواد  اللي  بتدوخ البشر  ..  يا سلام  ع  النحو عندي ..  مزاااااج  ..  الرياضيات  كانت  و لا زالت عقدة ناس كتير  ..  يا سلام  على يوم  ما وقفت المسالة  مع الاستاذ  و احنا في تالتة اعدادي  و قال نخليها للحصة  الجاية  .. قمت  فاقع الحل   ..  الاستاذ  بكل استاذية  حضنني و باسني

 

 

خلاصة المسالة  ..  بدات اتجه  ناحية سماع القصايد  ..  و سمعت قصيدة  زمااااان  .. كان اسمها  : يا ضنين الأمس    برضه  لعبد الحليم 

 

كبرت  و بدات تكبر مواهبي  و كنت باكتب  ..  ربما  اللي  قلل كتابتي  او اهتمامي بيها  .. انه كان عندي مشروع  تفوق   و كنت باخطط  اواصل الحياة  الاكاديمية  في الجامعة  ..  لغاية ما لقيت حلمي بيتسرق بسهولة  ..  لقيت  ترتيبي  من الاول  نازل للرابع   ..  بضربة  موجهة  بعناية  مركزة  من لجنة مناقشة المشروع 

 

و المشروع  كنا مجموعة من خمس افراد..  تقريبا انا اللي عامل  اكتر من 80 % منه  ..  الاستاذ  رئيس لجنة المناقشة بسلامته و باصرار عاوز يعطيني جيد جدا  .. ليه مش عارف ..  لولا  اصرار الاستاذين المشرفين  باعتبار اني اول الدفعة  و غير كدا  انجاز المشروع  انا صاحب الايد  الطولى فيه .. و بعدين في المناقشة  انا اللي واكل الجو ..  المهم  اخدت امتياز بنسبة 85 %  في مادة  مشروع التخرج  ..  و اللي الاخوة اللي معايا في المقدمة  لقيتهم كل واحد  واخد امتياز بنسبة 99 %  .. و هو دا الطبيعي للنخبة المتميزة ..  بحسبة بسيطة  لقيتني  كنت ابقى الاول  بفرق  1 %   لو  ما اتعنتش الاستاذ اياه  ..   لغاية الوقتي  عاوز اعرف كان لمصلحة مين  !!! .. 

الله ..  و اللا آخر مادة في الامتحان  ..  يومها الدكتور المشرف ع الدور  ..  زي ما يكون بيني و بينه  حمامات دم  من الف سنة  ..  و كان عاوز يخرجني من الامتحان و السبب اني كنت باتكلم  ..  لولا الاتنين المراقبين و باصرار .. قالوا اني اتكلمت بناء على طلبهم  اني اترجم كلمة للزملا  في اللجنة .. نظراته كانت غير طبيعية  بالمرة . 

 

المهم  ..  اصبت بحالة من القرف  ..  و اخدت قرار  اني  اخرج  منها بسلام  آمنا 

 

 

نرجع  لعبد الحليم .. و الاغاني من تاني

 

من فترة كنت في منتدى ..  واحد بيقول  اطلب الاغنية اللي انت عاوزها   ها تلاقيها  حالا  ..  مر بخاطري اني اطلب اغنية  يا ضنين الأمس  ..  و دي قصيدة كنت سمعتها زمان  .. بصوت عبد الحليم

 

المهم  .. الاخ  اعتذر  انه  مش لاقيها  ..  لقيت القلب الحنين  بتقول لي اتفضل  :  هي دي  ؟  شكرتها كتير 

 

في نفس الوقت انا حاولت ابحث عن الاغنية دي في النت   ..  لقيت  اللي خلى نفسي  عاوزة  ترجع  كل اللي جواها 

 

لـــــــــــــــــــــــــــــــــــــــــــــــيه  ؟

 

 

لقيت  ان قصيدة يا ضنين الأمس  اول من غناها  هو  كارم  محمود   ..  و عبد الحليم  عجبته الاغنية  ..  غناها  ..  و بقت الاذاعة  تذيع  الاغنية  بصوت عبد الحليم  و هالت على كارم  محمود  كوم تراب

 

و لقيت كمان  قصيدة  .. و كنت برضه  باسمعها  بصوت عبد الحليم  اسمها  سمراء  ..  سمراء يا حلم الطفولة  .. يا منية النفس العليلة  ..  كيف الوصول إلى حماك  .. و ليس لي في الأمر حيلة

 

بادور  في المنتديات المتخصصة  زي منتدى سماعي  ..  لقيت ان القصيدة برضه بتاع كارم محمود   و عبد الحليم  خطفها 

 

قلت ف نفسي  لا لا لا  ..   النوذج دا من البشر  ينكره   ..  طيب قبل ما تظلمه  ..  دور شوية  و شوف ايه الحكاية

 

لقيت الحكاية  طين اسود  و معطن 

 

و فضلت اكر الخيط  لغاية ما وصلت  لنقط   تخلي الواحد  يعيد حسابات التاريخ المزيف للامم و الاشخاص

 

 

لقيت الاستاذ  الكبير  اللي الدنيا رافعه راياته ..  وراه كتير   لازم ينقال

 

الاستاذ  خطف  حاجات كتيرة  متميزة  و استولى  عليها  زي قطاع الطرق 

 

مثلا مثلا  ..  يا ضنين الأمس  .. و  ..  سمراء ..  خطفهم من كارم محمود  ...  يا مالكا قلبي  خطفها من نجاح سلام المطربة اللبنانية  بتاع اغنية  الشاب الأسمر جنني  و لها كمان اغنية في حب مصر اسمها  يا اغلى اسم في الوجود يا مصر  ..  و موال أدهم الشرقاوي اللي خطفه من محمد رشدي

و الطامة الكبيرة  ..  انه خطف شخص بحاله  من مطرب متميز

 

مش عارف ازاي  الجدع اللي اسمه عبد الرحمن الابنودي  بيتقال عنه انه صعيدي  ؟   مع ان القصة  اللي بتتحكى  ..  و اللي سمعتها منه  من كام سنة  ..  في وفاة المطرب الشعبي العملاق محمد رشدي  ..  القصة اللي حكاها   تنفي انه صعيدي   .. لانه لو صعيدي بجد   كان حرق  اتنين .. حرق  مجدي العمروسي و عبد الحليم حافظ

 

لما فتشت و دورت  .. لقيت ان عبد الحليم بيه حافظ   و هو على سرير المرض في لندن ..  لما عرف ان القاهرة باتت تصفق لمحمد رشدي  لابداعه في اغنية عدوية  و دا كان في  الستينيات ..  اكلت الغيرة قلبه  و غادر لندن الى القاهرة من غير ما يكمل علاجه  ..  و قعد مع  مجدي العمروسي   يحلوا اللغز   ..  واحد  ها يخطف النجومية منه  ..  السبب ايه و الحل ازاااي ؟

 

لقوا ان النجومية  سببها  صوت رشدي و كلمات الابنودي   ..  و كان القرار  :  خطف الابنودي 

ليه يا اخي ؟  ما تشتغل و تتميز و تنافس بشرف

 

و بالفعل  مجدي العمروسي  اتفق مع اللي يخطف عبد الرحمن الابنودي في شوال  ( جوال ) 

بذمتك يا عم الابنودي انت صعيدي ؟  ما كنتش مكسوف و انت بتقولها  ؟؟؟   تتخطف في شوال يا عم يا صعيدي و يجي لك نفس تكتب للي خطفك ( في شوال )  .. يا خسارة الرجالة ..  و يا فضيحة الصعايدة ..

 

المهم  ..  مع لف  سلاطات التاريخ في بعضه  ..  الاستاذ عبد الحليم  مع الاستاذ الدكتور اللواء محمد عبد الوهاب اللي كان صديق مقرب لعضو من اعضاء مجلس قيادة الثورة  ..  كانوا واصلين   لدرجة انهم  يمنعوا اغنية فلان  من الاذاعة  و يردموا عليه تراب بارتفاع خمسة متر

 

و دا اللي حصل 

 

الاستاذ عبد الحليم  كانت تعجبه اغنية فنان من هنا   يروح مغنيها  و تنذاع الاغنية بصوته  و المغني الاصلي  بح خلاص   يرموا تسجيله  في غياهب النسيان

 

طب يا ترى سي عبده  كان بيعمل كدا ليه  ؟

 

 

المحللين بيقولوا  ان نشاته يتيم  و حرمانه في طفولته  و تربيته  خلته يبص لاي حاجة في ايد اي حد و يتطلع انه ياخدها منه  و يحرمه منها  حتى لو كان هو شخصيا مش محتاج لها

 

اخص على كدا

 

 

مش قادر اقول انا كرهته

 

لكن انا كرهت المبدأ دا

 

لانه اتخطف حلمي  و انا اللي دايما  احب اساعد المتميز  انه يتميز اكتر

 

كرهت نموذج عبد الحليم   اللي يكره تميز غيره  .. لا  و ايه  يخطف منه التميز  .. و بتعاون مع قوى قذرة يدوس نجاح الآخرين

 

 

غني يا عم كارم  :  يا ضنين الأمس مرجو الغد .. هل لدى الأيام لي من موعد  ؟  يصل المبعد بالمبتعد

.