أينشتاين كان حرامي .. و هاكتب فيه بلاغ لشيخ البلد

.

آآآآآآآني الموقع أدناه .. ميكانيكي كمبيوتر باتهم الجدع اللي اسمه البرت بن اينشتاين انه حرامي

و عاوز ارفع عليه دعوى بالخصوص دا

و اتهم الآلة الدعائية اليهودية انها عملت منه نمر .. و هو نمر من ورق

يا حراااام .. دستور يا اسيادنا .. الواد الاسطى حصل له ايه ؟

الواد كان كويس و زي الفل من كام يوم .. ايه اللي جرى لك يابني ؟؟؟

هل بت ما هييجي ناس يقولوا : و هو انت يعني دونن عن كل الاسطوات اللي في الدنيا عاوز تعمل فيها فركوكة و تعمل راسك براس المدعو البرت بن اينشتاين و تقول راي فيه !! تطلع مين انت يا واااد و ايش تكون علشان يكون لك راي اصلا في الكلام بتاع اينشتاين بيه ؟؟؟

بقى اينشتاين بيه اللي لما طلع بنظرية النسبية بتاعته ما كانوش فاهمينها في الدنيا دي كلااااتها الا قول كدا ييجي خمس بني ادمين .. تيجي انت يا حتة اسطى في بلد مش ع الخريطة تقول كلام مالهوش معنى ؟؟؟

دا حتى اينشتاين بيه اللي حير الناس بنظرية النسبية بتاعته .. و كمان اخد نوبل و كان الألفة بتاع العلماء بتوع العالم كلاتهم اتبرع بمخه يشرحوه بعد ما يموت علشان يجيبوا سر العبقرية بتاعته لانهم بيقولوا عليه اكبر عبقري في العالم.

اسمع يا اسطى .. لم الدور .. و اكفي ع الخبر ماجور .. و اطلع منها يا ابني بدل ما يحطوا اسمك في مذكرة التوقيف اللي ها تطلع باسم البشير و يحاكموك .. اصل ولاد الابالسة ايديهم طايلة و انت مش حملهم

شوفوا يا اخواننا : اينشتاين بيه دا زيه زي واحد في الجيرة بتاعتنا .. كان (غفير مناصل ) و بقدرة قادر دخل مجلس الكعب العالي و بقى اسمه زي الطبل

و للتوضيح .. المنصل دا يبقى مصرف يعني .. بيصرفوا فيه الميه بتاع الارض الزراعية .. و الغفير هو الخفير .. بس مش خفير الداخلية ابو بالطو اصفر و صفارة .. دا حارس لمصارف مياه صرف الارض الزراعية

بيقول التاريخ : في ستينيات القرن اللي فات في هوجة الاشتراكية الناصرية و تغمية بصر الامة بوجود اكتر من خمسين في المية عمال و فلاحين و الكل من فئة بصمجي يا بيه .. دخل عمنا غفير المناصل و بقى اسم على مسمى .. لا و بيقولوا ايه .. بيقولوا انه كان بيقعد مع جمال عبد الناصر سخصيا و حتى في مرة اشترى حتة قماش صوف من اللي هوه و سال الريس .. افصلها بدلة يا ريس ؟ قال له : لا .. الجلابية هي الاصل .. فصلها جلابية

و انا كدا قول كنت في اولى اعدادي كنت هاترقع علقة من اخويا فضيلة الشيخ لاني ضحكت و علقت تعليق سخيف حبتين على سيدنا البصمجي اللي كان بيمثل مركزنا في مجلس النهب الواطي .. ليه ؟ لان بسلامته قاعد بيتكلم كلامه كدا زي ما تقول مناخوليا .. فساخونيا .. لا راي و معنى .. الضرب كان ها يبقى لاني كان لازم احترم راجل كبير في سن جدي و قضى اكتر من ربع قرن بيمثل دايرتنا في المجلس النيابي .. لكن اخدت مكافاة سرية اني قدرت افنط كلام الراجل

ايه يا اسطى ؟ انت واخدنا ع العربية الكارو و نازل بينا النيل نشرب ؟

اصبروا معايا يا اخواننا بس

اينشتاين بيه دا سمعت عنه و عن بطولاته و فتوحاته الفيزياوية و كنت منبهر بالكلام اللي بينقال عن عبقريته

لغاية ما ف يوم اتصدمت بالكابتن شاينشتاين وجها لوجه في كورس عن النسبية الخاصة و انا تلميذ في الورشة .. و عشان مانا كنت خايب قوي يا دوب جبت امتياز في المحروق كورس الفيزيا اللي كان عبارة عن النسبية الخاصة و مقدمة في الفيزيا الذرية

المهم عدت كام سنة .. كنت في سنة تالتة .. و اني زي ما انتو عارفين .. اسطى .. اخواننا بتوع علوم او تربية .. اللي مزنوق في موضوع فيزيا او رياضة ييجي للاسطى جري .. اقول له سيب الكتاب شوية اقرا الدرس و ربنا ها يجيب الفرج

الاحتكاك مع اخواننا بتوع علوم بالذات فتح عينيا على موضوعات فيزياوية مش عندنا في الهندزة .. او بيدرسوها بوجهة نظر و معالجة تختلف عن معالجاتنا التطبيقية

من الاحتكاك دا لقيتني باتعامل مع افكار و معادلات رياضية اتعملت قبل المدعو اينشتاين و المدعو اينشتاين بينسبها لنفسه .. لقيتني باتعامل مع اسماء زي فيتزجيرالد و لورنتز و ماكسويل يمكن قالوا الحاجات دي قبل المدعو اينشتاين ما يتولد

لقيت العلم ماشي في مسار افكار علماء و فلاسفة لهم شنه و رنه في مجتمعاتهم

دي حتى المعادلة الشهيرة E = m C ^2 المعادلة دي موجودة في المحافل العلمية قبل جريمة اينشتاين بسنين. و بالافترا بيخرقوا بيها نظرنا في كل الكتب العلمية على انها بتاع الجدع دا اللي اسمه شاينشتاين .. شيطان لهفه

المدعو اينشتاين لو دورنا في تاريخه التعليمي و العلمي ها نلاقيه بليد و اتخرج برضه بمستوى يعني مش فذ و لا حاجة

لغاااااية ما جا يوم الوعد

يوم ما اشتغل في مكتب تسجيل براءات اختراع

و علشان ما انا اسطى .. ما كنتش باكتفي بكتب الدكاترة .. كنت باشتري كتب غير كتبهم .. و كنت باشتري مجلات و بلاوي مسيحة لما هرشت مخي

و اهو انتو شايفين دليل هرشة المخ اهوه

في يوم فتحت الكتاب اللي اشتريته و كان عن اللطيفة الظريفة ربة الصون و العفاف : النسبية خانوم

خانوم دا اللفظ التركي اصل كلمة هانم

الكتاب كان بيتكلم عن النسبية كعلم .. و بعدين كان فيه جزء تاني ملحق عن الآراء اللي اتقالت في النسبية .. دخل في المحظور .. قال انهم بيقولوا انه البرت بيه اينشتاين حرامي

يا نهار اسود .. دا انا شكي ف محله

بيقولوا ان زوجته و هي بنت عمه كانت عبقرية و هي صاحبة النسبية و هو سرقها منها

و بيقولوا انه سرقها و هو في مكتب براءات الاختراع

كمان اللي يقرا المحاورات اللي حصلت بينه و بين العالم الألماني الفذ فيرنر هيزنبرج في كتابه عن سيرته الذاتية : الجزء و الكل .. ها يعرف اينشتاين دا يطلع مين

الكلام كتير حوالين الجدع دا ..

بس ليه الكلام دا مش بينتشر ؟؟؟؟

وراه رجاله .. لانه زي ما كلنا عارفين .. اينشتاين بيه من ولاد اعمامنا .. و حد يقدر يقف قدامهم ؟؟؟ !!

اذا كانوا بلعوا وطن و ما حدش قادر يقول لهم بخ .. ها تقف على نظرية تتسرق ؟

دا لسه موضوع انه هو ابو نظرية الكم

دي فيها كلام يهلك من الضحك

.

اكيد حد ها يسال : انت سايب الورشة بقى لك كذا سنه يا اسطى .. ايه فكرك بالجدع دا الوقتي ؟

من كام شهر في احد المنتديات كان واحد كاتب موضوع عن النانوتكنولوجي .. يعني كلام في الفيزيا الحديثة و نظرية الكم .. و الكلام و المناقشات جابت سيرة مقصوف الرقبة اللي اسمه اينشتاين

كنت عاوز ادخل و اعلق و اقول : يا اخواننا .. اينشتاين حرامي .. بس لقيت اني علشان اقول حرامي الموضوع ها يلزمه اخد و رد و حجة و اقناع و معادلات و تاريخ نظريات علمية .. و بصراحة ايامها كنت مشغول مع ام العيال

ام العيال الوقتي مسافرة و انا فضيت لوجع الدماغ و هرشة المخ

المبلغ بما فيه

الاسطى : ميكانيكي كمبيوتر

.