أوكتافيا

أوكتافيا نزقت

 

أوكتافيا انزلقت

أوكتافيا انتحرت

 

أوكتافيا رحلت

و مشاعر أوكتافيا انسجرت

حالات .. يا ترى .. انت في أي ركن ؟ !!

.

كتاب اسمه

 

ChangePower

 

بانصح بقراءته

 

دي كلاشنكوفاية منه

 

 

…

 

 

CASE ONE

 

I walk down the street.
There’s a deep hole in the sidewalk.
I fall in.
I am lost … I am helpless;
It isn’t my fault.
It takes forever to find a way out.

CASE TWO

 

I walk down the same street.
There is a deep hole in the sidewalk.
I pretend I don’t see it.
I fall in again.
I can’t believe I am in this same place;
But, it isn’t my fault.
It still takes a long time to get out.

CASE THREE

 

I walk down the same street.
There is a deep hole in the sidewalk.
I see it is there.
I still fall in … it’s a habit … but,
my eyes are open.
I know where I am.
It is my fault.
I get out immediately.

 

CASE FOUR

 

I walk down the same street.
There’s a deep hole in the sidewalk.
I walk around it.

 

CASE FIVE

 

I walk down another street.

.

في مثلث الضوء .. مع الريس براهيم ابو حجازي

.

 

عمنا الريس براهيم ابو حجازي  ..  بتاع برنامج مثلث الضوء  .. مربع الضوء .. معين الضوء .. اي شكل هندسي الضوء  .. و لو حتى  دائرة الضوء  .. ما يضرش برضه

عمنا براهيم ابو حجازي ..  راجل شرقاوي جدع  ..  طلع فلاح من المحافظة اللي شرفنا عدل  ..  عندهم مصطبة  و حمار ببردعة  ..  و  شكله كدا  كان بيصطاد بالجوبيا  زي حالاتي  ..  اللي ها يسأل عن الجوبيا هاخلي نهاره كوبيا  ..  لان دي اسرار  هاي تيك  اللي يقرب منها  ممكن اغتاله

نركب الحمار بقى  .. اقصد  ندخل في الموضوع 

عمنا براهيم   .. في ايام  الموجة الجراداوية  من جرذان الصحراء  ..  كان عامل شغل كويس

لكن

لكن  كان مين  جنوده في المعمعة دي  ؟؟؟

اغلب الجيش اللي  وقف ورا عمنا براهيم  كان  فنانين و فنانات  .. مطربين و مطربات .. و نطاطين و نطاطات   .. و انت  ابوك السقا مات

طب يا عم براهيم  .. فين الناس القيمة  ؟؟

يا عم براهيم  .. فين الاساتذة ؟ و المفكرين ؟ و أصحاب الرأي ؟؟ قليل ما هم

انا بصراحة وقتها  .. تحشرجت في نفسي أشياء كتيرة

لغااااااااااااااااية  .. ما جات شيرين لابوظبي  علشان تشارك في عيد الاتحاد

قالوا لي  :  انها كانت لابسة فستان  بالوان علم الامارات

استاذنت انها تمسك في ايديها  علم بلدنا مصر  ..  و سمح لها بكل سرور

بعض المصريين  طلبوا منها تغني اغنية  .. ما شربتش من نيلها  .. بكل لباقة اعتذرت .. و قالت : ان شاء الله  هاسمعها لكم  .. لكن احنا في مناسبة  و ما ينفعش اغني الاغنية دي الوقتي

بصراحة  .. عجبتني ردودها و لباقتها  و حضورها  اللي كان رائع  .. دا على حسب ما سمعت من اللي حضروا الحفلة او شافوها في التليفزيون

انا بقى  هامسك الموضوع دا  و اقف عنده شويه

ما دام  عملتنا و بضاعتنا   هي الفنانين   و المطربين  و دول اللي بنعتمد عليهم  في  نشر  وجهات نظرنا  و تعريف الناس بقضايانا ..  انا عاوز اقترح اقتراح  نص لبة  ..  يمكن يعجب و يمكن ما يعجبش

في الزيارات الخارجية  لمطربينا و فنانينا  و الذي منه   ..  ليه ما يمروش  على جهة  اعلامية  معينة  .. ياخدوا  معلومات  معينة عن المكان اللي رايحين ليه  ..  و ياخدوا تعليمات محددة  عن الشكل و المظهر و المعلومة   و و و   ..   علشان بالفعل يكونوا سفرا  بحق و حقيق  .. و يكون فيه فرض مؤكد على القنصليات  بالتواصل مع الناس دي في الخارج 

لكن  التعامل دا  يكون  بعيد  عن اسلوب  جنرالات السراير    ..  بتوع فلم كشف المستور 

و بكدا   ..  ممكن   يبقى  فيه  حضور  للشخصية  و الدولة  علشان الفايدة  تعم

حد يبلغ الكلام دا لعمنا براهيم ابو حجازي   ..  بشرط يدفع  نص ريال  نظير الفكرة دي

قال شرقاوي قال

يا عم طب اعزمنا  على  اكلة  معمر  بالحمام المدفوس

 

.

اسمع يا نجيب محفوظ .. انت نزلت من نظري

.

 

 

شوف يا كابتن نجيب 

انت كدا بالصلاة على النبي  .. واضح انك كنت حرباية  كبيرة قوي .. بتتلون  بكل لون

مش ضروري اكون شفتك  او قعدت معاك  في غرزة شهبور  نضرب أنفاس من الازرق  علشان اعرفك  و اعطي  راي فيك

شوف  يا كابتن 

ندخل في مربط الجحش عدل

كتاب  .. أمام العرش .. حوار مع رجال مصر من مينا إلى أنور السادات

واضح من اللي مكتوب في الكتاب  انك الفته   بعد  موت المرحوم 

رقم الإيداع 3049/83

يعني بسلامتك يا نوجا افندي  عملت الكتاب  بعد موت السادات

بقى يا راجل يا ناقص  ..  الاقيك  جايب سيرة   سمعان الجرجاوي  الحداد  من أسرة حدادين ..  و علي سندس .. السقاء   ..   و تنسى  تكتب حرف واحد عن أول  مصري يبقى رئيس لمصر  بعد احتلالات دامت عشرات القرون  ؟؟ !!

يا مفتري

طب الزعيم كان مات خلاص  .. و الزعيم التاني برضه كان مات  .. و الزعيم التالت  مالهوش خصومة مع الرئيس محمد نجيب  .. يعني مش ها يلومك لو قلت كلمتين عن الراجل

كنت خايف ليه  تكتب عن الرئيس محمد نجيب  ؟؟؟

بجد بجد  يا نوجا  ..  من يومين بس  احتقرتك قوي  .. بعد ما قعدت حوالي ساعتين  اقلب في كتابك دا اللي نزلته من النت  .. و أفاجأ  بانك  تذكر السقايين و الحدادين و النقاشين و تجار الحبوب .. كان ناقص كمان واحد يطلع لي من الكتاب يقول لي :  شعر و اللا دقن يا اسطى  ؟

رجل كل العصور  ..  مقولة  زي السم  ..  حظك فيها كبير قوي يا نوجا

اسمح لي يا نوجا .. انت نزلت من نظري

 

 

.

الرجل السادس .. كوليرا في منعطف الحب

 

.

 

في وقت من الأوقات  ..  انتشر وباء الكوليرا  بصورة خطيرة جدا ..  كانوا في قريتنا  بيشيعوا 15 أو 20 جثمان في اليوم  ..  وصلت الأمور  لدرجة  انه  فيه ناس  طالبت بحرق جثامين  اللي ماتوا بالمرض دا  علشان  يقضوا على أس المرض.

تقول الأسطورة  :  أنهم كانوا يبحثون عمن  أصابه المرض  و يعزلونهم  بعيدا في الخلاء  ليحدوا من خطورة انتشار المرض  ..  و كان من يصيبه  المرض  و يبقى على وجه الحياة  حتى ( اليوم السادس ) من يوم إصابته فهذا دليل  على أنه  قد تجاوز الأزمة  و سيبرأ من لعنة الكوليرا

اليوم السادس  ..  كان الأمل المرجو  ..  كل اللي كان بيصيبه  مرض الكوليرا اللعين كان بيعيش على أمل  أن يأتي  اليوم السادس

لكن

لما تكون الرجل السادس في حكاية قلب  ..  يا ترى  دا يبقى  أمل  ؟

 

 

تنساح أدمعي  تهمي  بين ضفتي  رائعة أم كلثوم و أحمد فتحي و السنباطي

قصة الأمس

عش كما تهوى قريبا أو بعيدا

حسب أيامي جراحا و نواحا و وعودا

و ليالي ضياعا و جحودا

و لقاء و وداعا يترك القلب وحيدا

يا لذكراك التي عاشت بها روحي على الوهم سنينا

ذهبت من خاطري إلا صدى يعتادني حينا فحينا

…..

 

 

 

.

كل عام و انتم بخير

.

 

 

 

 

.

جرذان الصحراء .. و هلوسة في العبثية العربية

بدون مقدمات


يا ابا حسني


أنا عاوز أحس بقيمتي كمصري


اسمع يا ابا حسني .. هاقول لك بصراحة .. و ما تزعلش مني .. لان انا صريح .. لانه معروف عنا كمصريين ان لساننا هو اللي فينا .. و اظن من قديم الزمن .. موجود في التراث المصري حكاية ( الفلاح الفصيح )

يا ابا حسني .. ما تآخذنيش .. حمايتك ليا .. كرئيس لبلدي .. مش واصلة ليا في اي مكان اكون موجود فيه

قيمتي كمصري مش باستمدها من صفتي الرسمية .. لا لا لا .. قيمتي باحددها بشخصيتي و بقيمتي و بمعرفتي الشخصية و بتصرفي الشخصي .. الصفة الرسمية الحكومية للاسف مش عاطياني اي قيمة


اللحظة عبثية

الموضوع دا كنت بافكر فيه من مدة و عمال اخمره في دماغي علشان اكتبه

انا هاكلكع الموضوع بدون ترتيب

شوف يا عمنا .. و من البداية اوعى حد فيكو يتهمني بما ليس فيا

يعني ايه واحد مصري يبقى مع محمد عبد الرحمن العراقي ضد حنا صليب المصري ؟؟؟؟

يعني ايه واحد مصري يبقى مع خالد مشعل الفلسطيني ضد أيمن نور المصري ؟؟؟

يعني ايه واحد مصري يبقى مع ابن باز السعودي ضد علي جمعة المصري ؟؟؟

يعني ايه واحد مصري يبقى قومي عربي ضد الأمة المصرية ؟؟؟


انا يمكن الاحداث اللي حصلت من جرذان الصحراء مشعللة الموقف شوية و علشان كدا باصب افكاري في قالب عامي .. و انا كنت بافكر اني اكتب الموضوع دا بلغة عربية متميزة

الاحداث دي ملهلبة كياني .. انا صوتي سمع الجيران .. كنت بازعق باعلى صوتي : بس يا بنت الحلال .. و رجلي بتشوط في الهوا .. و دموعي كانت على وشك انها تنط تخرق جدران الشقة لولا اني منعتها .. كل دا حصل ساعة ما سمعت صوت بنت مصرية بتصرخ في الموبايل بتكلم ابراهيم حجازي في النايل سبورت و هي في العاصمة السودانية بتبكي في عز الليل و هي مستخبية ورا عربية في شارع سااااكت و لمدة ساعة و نص و خايفة تخرج بسبب الرعب اللي شافته من جرذان الصحراء الجزائريين




اسمع يا مصري

اذا كنا بننتقد نفسنا و على الملا .. فدا برضه مش وحش .. و دا بيدل على قوة و صلابة الشخصية

لكن عند التعامل مع من هو غير مصري .. فالمقدمة مصرية


انا هاعطيكوا مثال بسيط

عبد الرحمن خان مهندس باكستاني

و زي ما حضراتكو عارفين ما فيش حاجة في الخريطة اسمها باكستان او حاجة اسمها بنغلاديش .. فيه بس حاجة اسمها الهند

دهاقنة السياسة البريطانية لما لقوا ان وجودهم في المستعمرات بيكلفهم كتير .. بدأوا يرتدوا للجزر البريطانية مع ضمانة وجود تأثيرهم في مستعمراتهم .. عملوا ايه ؟؟؟؟ تطبيق بأمانة شديدة لمبدأ ( فرق تسد )

طيب الانجليز عاوزين يخرجوا من جنوب و جنوب شرق آسيا .. يبقى لازم يحطوا الفتيل .. طب ايه هو الفتيل ؟ وضع بذور خلافات بين الهند و الصين .. خلاص يا رجالة استبينا ؟ استبينا يا ريس .. نعمل مشاكل حدود .. طلع ابليس انجليزي و قال لهم انتو لسه بقي ما بتفهموش .. ايه يا جدع الحكاية ؟؟؟ قال لهم انتو نسيتوا العدو الأخطر اللي ممكن يهددكو .. ايه يا جدع ما تقول فيه ايه ؟؟؟ قال لهم : عدوكو الأصعب هو الإسلام ... طب نعمل ايه ؟ نعمل ايه ؟؟؟

عملوا ايه ؟؟؟؟

جابوا واحد عبيط اسمه محمد علي جناح .. ضحكوا عليه و سقوه القهوة و لبسوه الطربوش المتين

الاستاذ محمد علي جناح اعلن استقلال باكستان عن الدولة الأم اللي هي الهند .. الهند فيها عدد ضخم من المسلمين

الاستاذ جناح اخد المنطقة اللي اغلبيتها مسلمين و انفصل بيها

باكستان تعني الأرض الطاهرة .. باكستان دي كانت بتتألف من باكستان الشرقية و باكستان الغربية
باكستان الشرقية اللي هي بنغلاديش .. و باكستان الغربية اللي هي باكستان الحالية

و طبعا بعدين حصل انفصال لبنغلاديش عن باكستان الغربية

عاوز حضرتك كقارئ للكلام دا تفتح خريطة العالم .. و تشوف المسافة بين بنغلاديش و باكستان

المهم .. من اليوم دا .. اتخلقت عداوة بين باكستان و الهند .. حتى بين المسلمين في البلدين


طبعا سعادتك عارف ان الهند فيها الهندوس و السيخ و البوذي و بعض المسيحيين بنسبة ضئيلة


يعني اكيد سعادتك ممكن تتصور مدى الكره من باكستاني مسلم لهندي هندوسي او سيخ او بوذي


لاااااااااااااااااااااااكن

و خد بالك من لااااااااااكن دي


المهندس عبد الرحمن خان .. الباكستاني .. المسلم .. اللي كان يبقى جنبي في المسجد بيصلي معايا أو ورايا

نخرج من المسجد ( داخل المحطة اللي بنشتغل فيها ) .. تلاقي عبد الرحمن خان قلبا و قالبا مع شاندران الهندي الهندوسي ضدي انا المسلم اللي كنت معاه من شوية في مسجد المحطة

ليه ؟

لان انا عربي مصري و هو آسيوي

اللبناني المسلم مع اللبناني المسيحي ضد فلان الفلاني ( من جنسية تانية ) المسلم


يا جماعة

اوعى حد يفكر ان عقيدتي ضعيفة

اوعى حد فيكو يفكر ان تقافتي ضحلة

اوعى حد فيكو يفكر اني بادعو للخروج من الصف العربي أو الاسلامي

لا لا لا


بالعكس

لكن


لا بد أن تكون أنت أنت .. قبل أن تذوب في الجماعة

لا بد أن تكون أنت أنت .. حتى تكون قويا في الجماعة و بالجماعة



شوف يا أستاذ

اصحى و فوق ... فوووووووووووووووق يا أخ

أنا مصري مسلم أتكلم العربية


يخرب بيت اللحظات العبثية اللي ها تخلينا ندوس على حاجات كتير

و يخرب بيت الثقافة اللي ها تخلي الواحد يفقد عقله

اسمع يا افندي

روح دور و شوف تاريخ الدولة العربية الكبرى اللي كان رايح يعملها الشريف حسين

ابقى اعرف انت فين في التفكير العربي .. انت اصلا مش في الخريطة العربية

حبيبي .. انت مصري فرعوني

و اسمع كلام واحد عايش الذهنية العربية

عايش الذهنية العربية قراءة و ثقافة

و عايش الذهنية العربية تعاملا و احتكاكا


كن مصريا قبل أن تكون عربيا حتى يحترمك العرب


اللي بيحصل لنا من الجزائريين دا محتاج وقفة

التاريخ بيقول : ان نعوش طايرة وصلت مصر من العراق سنة 1989 .. لان العراقيين الاشاوس كانوا بيتسلوا بضرب المصريين بالسلاح لانهم خرجوا في شوارع بغداد العروبة يحتفلوا بفوز مصر على الجزاير




ابا حسني

نرجع لكلامنا تاني


انا عاوز احس ان دولتي بتحميني في اي مكان

مش عاوز اعيش الذل اللي عاشه دكتور مصري في السعودية يتحكم عليه بكام الف جلدة بحكم من قاضي مش عارف هو تبع اي مذهب

لا دا انا عاوز اسال .. القاضي دا .. تبع اي ديانة ؟؟؟؟؟؟؟

لان الحكم دا بجد بجد .. من خارج كتب الفقه الاسلامي اللي نعرفها


انت يا اخ يا مصري

الله يصلح حالك و حال اللي خلفوك

خليك مصري .. اسلامك مصري .. علشان خاطري بلاش الدين الوهابي المستورد دا

يا عم الحاج .. الواحد احيانا بيلاقي واحد متدروش و جايب شريط و يقول لك اسمع

سمعنا يا ريس حنتيرة .. ها تسمعنا ايه ؟

دا الشيخ فلان .. من السعودية

يا عم الحاج .. الله يصلح حالك .. ادينا سمعنا الشريط .. بالله عليك انت مش محروج و انت بتخلي اهل بيتك يسمعوا الشريط دا ؟

دا وصف سماعي لفلم جنسي باسم الاسلام يا عم الحاج

يا عم الحاج .. الاسلام اكبر بكتير من الزنا و عذاب القبر و اهوال يوم القيامة

يا عم الحاج .. الاسلام عقيدة اولا .. و عبادات ثانيا .. و معاملات ثالثا .. و أخلاق رابعا

يا عم الحاج انا كتبت بوست عن فتوى عمنا الشيخ الوهابي اللي بتحرم الصور

ابقى روح شوف صوره .. و هو لما بيطلع في التليفزيون .. دي مش صور ؟

اللي افتى بتحريم حصول مصر على سلاح روسي .. لأنه سلاح كافر .. و اللي بيفتي ان الغرب كافر .. طب يا حبيبي بتستعمل تكنولوجيا الكفرة ليه ؟؟؟؟؟؟؟


يا عم انا مخي قرب يلسع


ابا حسني


تصدق يا ابا حسني .. ان مشردي الارض .. اللي واخدين وثائق سفر من عندنا .. صوتهم اعلى من صوتنا

تصدق انهم بيهددونا في اكل عيشنا ؟؟؟

تصدق يا ابا حسني .. واحدة مغربية .. بكل صفاقة و جليطة و قلة ذوق .. تشتم واحدة مصرية في واحد من المحلات الكبيرة في ابوظبي

عاوزة تاخد دورها .. و بالفعل اخدت دورها قدام الكاشير .. و هددتها و قالت لها : انا ممكن اسفرك اليوم من هنا لبلدك .. و المصرية .. لا لا لا .. و المصريات اللي في الطابور مذهولين .. الست اتشتمت و اتهددت انها ممكن تتسفر هي و عيلتها في نفس اليوم .. و كعادة المصريين .. ما ردتش .. لانها كانت مذهولة من البربرية المغربية و انحطاط الالفاظ اللي اصلا كان بدون اي سبب .. و غير كدا .. عارفة انه ضهرنا مكشوف


ابا حسني



موقف جرذان الصحراء دا محتاج وقفة

وقفة مع الجميع


عاوزين نحس ان لنا ضهر

تقدر يا ابا حسني ؟

.

ارمي الموبايل بتاعك .. و اتبعني

بلا فخر  .. رميت الموبايل بتاعي  في صفيحة الزبالة 

و قررت الأمااااااان بالرجوع لعصر الحمام الزاجل 

و بلا فخر  .. قطعت كل شهاداتي العلمية و العملية 

و قررت الاسترياح بالعيش في كهف عنكبوت الجهل  المسلط علينا

و بلا فخر  .. قررت التقدم للحصول على الجنسية في دولة قردونيا  ..  احتماااال   ..  الواحد يلاقي مخلوقات عندها احترام للعقل  و تقدير لقيمة التواصل مع المخلوقات الشبيهة  .. بما لا يسبب ارتجاجا  في نفساويات  المواطنين و المستوطنين  من تلك المخلوقات .. 

و بلا فخر  .. قررت اشتم جهاز اعلام  .. بيقول انه راااائد في المنطقة .. و للاسف شكله ( رااااائد ) على ( تورتين ) او تلات ( تورات ) بيض  ..  فقس منهم كتكوت اعلامي فصيح  اسمه ( محمود سعد )  .. 

و منغصات الفخر كتيييييرة قوي 

ايه حكايتك يا اسطى النهار دا  ؟

و هو انت دايما تتحفنا بكلامك اللي عامل زي جو امشير  دا .. بعد رجوعك من وردية ليل  ؟؟؟؟

 

………..

متجمعين في الخير  يا بني القشلان  .. 

 

دي كانت العبارة اللي قلتها  لما اتصلت على اخويا بالليل  .. اطمن ع السريع .. و انا قاعد في الشغل .. و لقيت  ام نص لسان .. الدكتور سمية..

الدكتورة سمية تبقى بنت ابن عمي .. غلباوية .. و استاذة جرجرة شكل .. اقصد .. جدل سفوسطائي  ..  لا يقدر عليها مدرسة ارسطو  و لا الرواقيون  و لا حتى  توما الاكويني  او  …. فيصل القاسم و أحمد منصور و سامي حداد و جميل عازر و كل جنرالات قناة الجزيرة  كلهم مجتمعين

العبد لله  .. هو الوحيد  .. اللي معروف عنه  ان هو اللي يقدر يسكتها  .. و دا معروف  من ايام  ما كنا بنلعب عش الغراب في كوم التراب  قدام دار العيلة

انا اتصلت .. لقيت الجو  مزعبب .. خير يا جماعة  ؟؟

قالوا كويس انك اتصلت  ..  ايه رايك في موضوع 015 ؟ 

قاعدين بيتناقشوا  .. لا .. دا  ممكن يحصل  .. لا لا  لا  .. مش معقول يحصل 

اللي بيقول ممكن يحصل  .. بيستند على ان الكلام  اتذاع في برنامج البيت بيتك  ..  زي ما هو منتشر في الايميلات

و اللي بيقول مش ممكن يحصل  .. بيشغل  الامخخي  و كلام  المدارس

خد القط معاك اهيه  ..  عاوزة تسالك  ..  دايما يقولوا علينا ( القط يحب خناقه )

ازيك  يا خناقه  ..   ؟  دي الدكتورة بتسلم 

اهلا يا قط  ..  عاملة ايه   ؟   خطيبك عامل ايه يا بت  ؟

انتي لسه  بتخانقي  في الكتب يا بت  ؟

تلميذتك يا باشا   ..  و بعدين  .. فضيلة  الشيخ  عمي الحاج  .. فضله علينا كلنا  .. و مكتبته  فضلها كبير ع مثقفي العيلة

دا ايه العقل  اللي حط  عليك فجأة دا  ؟؟

ايه يا هندزة  ؟   ..  عاوزين نفرح فيك بقى 

بعد خرجتك  ان شااااء الله  ..  اقصد  بعد  ما نخلص منك .. ييييه .. بعد ما اطمن عليك 

بعد بهاريز  الخربشة و خلع الانياب بين  القط  و خناقه  ..

لسه بتقول لي  :  ها نعمل لك طقم الاسنان امتى يا باشا  ؟؟؟

ادخلي يا بت في الموضوع  ..  انتي  المرة دي   .. في اي اتجاه ؟ و مين اللي في الاتجاه المعاكس  ؟؟

انا طبعا  .. باقول  ان  الكلام دا  ممكن يحصل  …

قمت شاخط  بصوت عالي  ..  مش لاني  باشخط فيها  .. لاني عارف انها واخدة الاتجاه المعاكس  ضد الكلام  اللي قالته ليا 

لكن شخطتي  كان لها سبب  تاني 

انا من العصر   و انا مشحوووووون  لدرجة اني على وشك الانفجار

لييييه ؟

لانه وصلتني الرسالة دي اوفلاين

 

هــــــــــــــــــام في حلقة الامس من برنامج البيت بيتك تم اذاعة تحذير هام لكل مواطن بعدم الرد على اي رقم متصل يبدأ برقم 015 لأنه عند الرد عليه يرسل موجات سرطانية عبر المحمول و يتسبب في امراض كثيرة و طبعا مفيش حد هيرد عليك ,,, ياجماعة عدد المصابين في ازدياد ,, ياريت كله يبلغ اللي يعرفه ,, الموضوع ده مهم جدا: اوعي يلعب الشيطان في راسك وتقرأها وتقفلها وتقول انا مش فاضي ارسلها يقول: تخيل انك واقف يوم القيامة وتحاسبو فجأه تجد جبال من الحسنات

الرسالة  وصلتني  من  تلات اطراف مختلفين  ..

و الاطراف يفترض  انهم  مستوى  تعليمي  متميز  ..

لما يكون من ضمنهم   مستوى  بكالوريوس اعلام  .. و اقلهم  ليسانس جغرافيا  ..   دا حسب التصنيف  المصري المنحط  ..   كليات قمة  .. و كليات قاع   ..  جاتنا نيلة  ..  قمة ايه  و قاع ايه  يا تخلف  ؟  الكلية  تبقى قمة  لما تكون  انت فيها   في القمة  ..  حتى لو كانت  كلية الجرجير

انا قرات الرسايل الاوفلاين  .. و حصل لي انكتام  بشكل  عجيب

الاخ  محمود ابو سعد   كعب الغزال  .. الله اعلم   هو بالفعل قال الكلام دا و اللا  ما قالهوش  ..  حتى  لو كان ما قالهوش  ..  هو برضه  اصلا  مش  باهضم  كلامه  ..  و باحس  فيه  بتفاهة  واطية المستوى

طبعا لو كان قال  ..  انتظر من اللي في مستواه الذهني   يقول اسوأ من كدا كمان

طب يا اخواننا   ..  خبر زي دا   ..  قبل نشره في وسيلة اعلام  .. مش المفروض برضه  نتحرى  دقة و معقولية  و صحة الخبر  عند اهل العلم ؟؟؟

المجتمع الفساخوني بتاعنا   ضاع يا رجالة 

احلف لك يا مؤمن  حلفان يجمد الميه  في البحيرات الاستوائية  ..  انه  ..  لو جبت الطبقة العليا في مجتمعنا .. ولاد النااااس  ..  و قعدتهم كووووولهم  على ( الكراويتة )  ..  و الكراويتة  في لسان اهل بلدنا  .. زي الكنبة كدا بس بتكون  اضيق شوية  ..  و كتاب  سيدنا الشيخ  كان فيه  كراويتات كتيرة  ..  لو جبت الطبقة العليا  قلت لك  ..  و قعدتهم  قدام مولانا   سيدنا الشيخ   يقرؤوا  سورة الاخلاص   ..  احلف  لك يا مؤمن  ان نسبة  98 %  منهم   ها يتمدوا على رجليهم  ..  و لو جبت لهم  كتيب من بتوع علي الجارم  مش الجبرتي يعني  ..  علشان يقرؤوه بصوت عالي  .. انا متأكد اني هارش عليهم مية نار .. كدا لا رحنا  للعصر الجاهلي و لا حتى العباسي

يا مؤمن  ..  انا هاطق من جنابي   و هافرقع  من  غيظي  

قال  ايه  ..  الموبايل    ..  لو  جات لك مكالمة من رقم  بيبدأ بـ 015  و رديت عليها  ها تطلق عليك  قذائف  من موجات  تسبب السرطان  ..  يا عيني  عليك  يا عزة   ..  اه يا عزة   ..  اه  يا عزة 

لما تشرق عزة ابقوا شربوها اتنين عصير

هل مصر  و اولاد مصر  وصل الحال بيهم  لدرجة ( عزة )  ؟

قصر الكلام  ..  طبعا  وردية الليل  بتبقى وجع   ..  و كثافة الشغل  اعلى حتى من وردية الصبح  ..  علشان كدا  ..  قفلت  مع  القط  .. اقصد  الدكتورة سمية  .. اللي  كانت ناوية  تفرد معايا الملاية السفوسطائية  ..

ما خرجتش كل الشحنات اللي انكتمت جوايا 

كل دا تفاعل   طول الليل  ..  و انا عمال   اصدع في دماغي   بالتليفونات  و التنقل  عبر الشاشات  لمراقبة  و تعديل اوضاع المحطات .. لغاية ما خلصت الشغل  سبعة صباحا

ركبت عزة  و روحت

علشان تسليم الوردية اتاخر شوية  للساعة سبعة و ربع .. لكتر  الملاحظات المفروض نقلها  لمهندس وردية الصبح  ..   كان الطريق اتزحم  بالعربيات اللي جاية من خارج  ام ظبي  ..  اقصد  ابوظبي  ..  علشان دوام  الصباح  ..  غنيت   .. عاشق ليالي الصبر مداح القمر  ..  لان الحركة كانت بطييييئة  ..  و النوم  طار  .. و الجوع  جرجرني   كان عاوز ينزلني  من العربية  اروح اجيب سندويتش من الدار و ابقى ارجع لها  في مكانها  لان  طابور العربيات  كان  بيعمل ( جري في المكان ) بتاع تمرينات الصباح الرياضية

الكلام بالكلام يذكر

بيطالبوا بشنق ( وزير )  الازهر   .. اقصد  .. فصل ( المشير ) طنطاوي قائد الأزهر  ..  ييييه  ..  مالك يا اسطى  لسانك اتعوج و اللا ايه  ؟   اقصد   ..  كلام  نهائي  ( بتاع  جورج  بالقشطة  .. غموس آخر حلاوة اهه    ..  مش  قرديحي  و لا حاجة  )    ..   بيطالبوا بإقالة شيخ الأزهر   ..  ليه  يا رجالة  ؟

اصل شيخ الازهر   .. قال للبت التلميذة  .. اخلعي النقاب 

طب يا رجالة  ..  و ايه اللي فيها   ..  ما تخلع النقاب 

لو قال  اخلعي  ( الخمار  )  انا على استعداد  اروح له ابهدله  ..  و اقول له يا مولانا    : انت بقى  بتخالف   نص  قرآني

لكن  بقى يا رجالة   .. – ..  و اللا  صحيح   .. ما هم  ملالي ايران بيقولوا  ان القرآن  اتحذف  منه  آيات و حتى سور كاملة ..

روحوا دوروا عندهم يمكن تلاقوا  ..  آية النقاب  !!!

موقف شيخ الازهر  يستحق عليه  التعزير   …  ممكن يتقال له كلمتين يسموا بدنه  او يتشال هيلا بيلا  و يركبوه  على ضهر حمار و يكون وشه لورا  و يلف البلد كلها  ..  دا  مخصوص علشان  طولة لسانه على بت من سن احفاد احفاده   و اتكلم بكلام  بنرفضه من الشوارعي  .. دا طبعا في مجتمع بيعرف يعني ايه  قيمة الانسان  و حريته  و ازاي يصون قفاه  ..    لكن مجتمع   قفاه  مشاع  للقاصي و الداني  يبقى عنده قيمة ازاي  ؟؟؟؟؟

بركات المقدم جمال بيه عبد الناصر عاملة الواجب بصراحة

اقوم اتخمد انااااام

.

 

من حكاوي جدتي .. الصبر هو اللي حرق الدكان .. يا خرابي

.


الأسطى عبد الرحمن أبو جمعة .. دا الأسطى بتاع ماكنة الطحين بتاع بلدنا .. دا ييجي كدا قول من خمسين سنة يعني

الأسطى عبد الرحمن كانت مراته اعتدال بتتوجع .. وجع دلاليعي كدا .. ما هي عقبال املتكو كانت في شهرها


عبد الرحمن .. الظاهر اني هاعملها الليلة دي

اعقلي يا مره .. امسكي نفسك كدا للصبح .. ابعت اجيب امك و اللا اختك من بلدكو

كانت لسه يا دوب العشا متصلية .. و الجو كدا زي ما تقول في نوفمبر و كآبة الخريف



بعد نص الليل ..

عبد الرحمن .. الحقني يا اخويا

الطلق حمى قوي

نادي لعدلات الداية بسرعة يا اخويا الله لا يسيئك


يا بت يا اعتدال اجمدي يا بت ... يعني هي دي أول مرة تعمليها ؟؟؟ ما لك يا بت كدا خرعة المرة دي ؟؟


و عنها .. اتعازمت اعتدال بكل عزم فيها و فقعت صوت في الليل الرايق من تقل الوجع اللي فيها


الاسطى عبد الرحمن شمط البالطو على كتفه و طلع جري .. يا ست عدلات .. يا ست عدلات .. يا ابو ابراهيم

يا ابو ابراهيم .. خلي عدلات مراتك تلحق اعتدال بسرعة .. حالتها صعبة قوي



اجمدي يا اختي .. شدي نفس جامد .. تقولش ملغمة لها الجوزة بحتة تعدل المزاج


اسمع يا ابو حموءة .. بسرعة يا اخويا توصل دكان الحاج علي أبو صيام .. تجيب من عنده شوية صبر

دكان ايه الوقتي يا ام ابراهيم ؟؟ انتي عارفة الساعة كام الوقتي ؟؟ دا احنا الساعة اتنين بعد نص الليل


يا ابو حموءة .. روح خبط على باب دار الحاج علي ابو صيام و قول له الحاجة ام ابراهيم بتقول لك : شوية صبر


ها ييجي يفتح الدكان .. و ها يعطيك الصبر .. تجيبه و تيجي



ابو حموءة حاطط ديله في سنانه و بيجري .. ملهوف يا عيني على مراته اللي بقت زي اللمونة الدبلانة


عمال يجري .. و كلاب البلد كلااااتها بتجري وراه .. لولا في ايده خرزانة بعوجاية بيخوفهم بيها كانوا قطعوه



يا عم الحاج علي .. يا عم الحاج علي .. الحقني بشوية صبر الله يسترك دنيا و آخرة


الحاج علي فتح الشباك .. و النوم بيجرجره تاني للسرير .. ايوه يا ابو حموءة .. ما كا نش ينفع تصبر للصبح ؟


ام العيال في حال غير الحال .. الحقني


الحاج علي نازل بيتتااااوب .. و شايل في ايده لمبة بشعلة .. بتطلع دخان و لا مدخنة مصنع الطوب اللي جنب بلدنا


ربنا ينتعها لك بالسلامة يا ابو حموءة .. ام ابراهيم ما بتطلبش الصبر دا الا ساعة الشديد القوي

ادعي لها يا حاج علي .. انت راجل كبارة و متقي و عارف ربنا .. ربنا يستجيب منك


الحاج علي فتح القفل اللي على الجريدة الحديد اللي محزمة باب الدكان .. ماسك اللمبة ام شعلة و داخل يجيب الصبر


الحاج على اتعتر في شوال .. انكفا على وشه .. وقعت من ايده اللمبة .. الجاز سال .. و النار شبطت


الحق يا جدع .. روحوا لي يا هووووه .. الحقوني يا بلد



جالك يا واد جالك

و تقاطر البشر من كل حدب و صوت .. من كل زقاق و حارة .. اللي شايلة بستلية ميه .. و اللي شايلة طشتية ميه

و اللي شايل عكاز ..... ناوليني يا بت الطشتية دي .. خد يا جدع ادلق المية دي بسرعة .....


بس بعد ايه ؟؟؟

النار كانت لهفت كل البضاعة اللي في الدكان


الحاج علي عمال يعيط و يبرطم ع الخسارة اللي حصلت


واحد بيقول له : الصبر يا حاج علي


صبر مين يا ابني .. ما هو الصبر هو اللي حرق الدكان









انا بقى عاوز اعرف .. ايه كانت لزمة الصبر يا ام ابراهيم ؟؟



اللي يعرف يقول لي .. لو مش ضروري ما ابقاش اروح اجيبه



.

قول لي .. قتلت نفسك كام مرة ؟؟ !!!

.

آخر مرة قتلت فيها نفسك كانت امتى ؟؟؟ !!!

.

.

هل قتلت نفسك مرة بالرصاص ؟

.

.

هل قتلت نفسك مرة باحتساء بعض من كأس جرير ؟

.

.

هل قتلت نفسك مرة بطريقة السيبوكو كما يفعل الساموراي ؟

.

.

هل قتلت نفسك حبا ؟

.

.

هل قتلت نفسك ضحكا ؟

.

.

هل قتلت نفسك حزنا ؟

.

.

هل قتلت نفسك ؟ ... هل قتلت نفسك ؟

.

.

ترى .. كم مرة يتحمل المرء منا قتل نفسه ؟

.

.

طيب .. و ليه بقى بتقتل نفسك ؟؟؟ !!!

.

.

و مين دا اللي عنده العزم و المواجهة و يقتل نفسه مرة و اتنين و تلاتة .. و كتييير ؟؟

.

.

و هل فيه حاجة تستاهل تقتل نفسك عشانها ؟ او حاجات .. لانك بتقتل نفسك كتيييير ..

.

.

قلت لي .. آخر مرة قتلت نفسك فيها .. كانت ازاااي ؟ و ليييه ؟

.

.

و ما كانش فيه حل تاني غير انك تقتل نفسك ؟؟؟ !!!

.

.

تشرب معايا شاي ؟ و اللا بتشاور نفسك في كاس جرير ؟

.

.

.

اصحى ياعم المفتي .. اصحى يا شيخ الأزهر .. و هييييييييه

.

 

 

آآآآآآآآني يابا المفتي   و يا جدو شيخ الازهر  حتة أسطى مسكين لا راح و لا جه  .. يا دووووووب حتة ( نحو أمية )  …  و دي يعني كدا لا مؤاخذة .. شهادة معلقها في المندرة بتاع دارنا اتمنظر بها ع اللي رايح و اللي جاي  ..  بس  الحقيقة  اااااااني لا باعرف افك خط  و لا استقرا جواب

يعني  .. مش انا اللي هاعلم فحول العلم زيكوا  ..  ااااااني بس هازعق و اقول : الحقوني يا هوووووووووه  ..  تصحوا فضيلة المفتي و فضيلة شيخ الازهر  رضي الله عنهما و أرضاهما

ما هو  لما تحصل مصيبة زي اللي حصلت  و ما اسمعش حس للنفرين دول بالذات  .. يبقى لازمن و حاااااتمن  ارفع  عقيرتي  لاعلى طبقاتها

نورنا يا اسطى  ..  عاوز  تقول ايه  ؟

شوفوا يا بشر و احكموا على كلامي .. لو غلطان  قولوا غلطان ..

لما تطلع وسائل اعلامنا  .. و تتهم منتخبنا بفعل الفاحشة  .. يبقى احنا هنا قدام مصيبة

ااااااني هنا لا بادافع عن منتخب  و لا عن كورة و لا حاجات من دي

اااااني  تركيزي كله  على  حالة قذف 

و اعلام عام  وطني  من داخل بلدنا ردد الكلام دا  على مسامعنا و على مسامع اسرنا  نسوان و رجالة  و صبيان و بنات .. و ابوك السقا مات !!!

طيب يا عم الحاج  .. حتى لو انت شفت  بأم عينيك  ..  لو  قلت  .. لاااااازمن و حااااتمن   يقام  عليك حد القذف 

و دي مسألة فقهية  مش متدارية  ..  و اللي قعد  قدام مولانا في الكتاب زي حالاتي  و  قرأ سورة النور  على مولانا ..  لازم  يكون  عارف الكلام دا .. أررررربعة شهداااااااااء ..  لأ  و اييييييه ؟؟؟  بشروط  يعني   ما ينفعش تتحقق  …  و كتب الفقه  معروف فيها ايه للقضية دي

طب دا  حصل  .. و تليفزيوناتنا و فضائياتنا و جرايدنا قااااااالوا …  و كل الناس  زعقت  …  اللي  شتم  معاهم و اللي قال عيب يا اخواننا ما يصحش  … الأصوات دي ما خرمتش  ودان أسيادنا  الفقها  الكبار  !!!!!!!

هل  يا ترى  ابونا الفاضل  مفتي الديار  و جدنا  فضيلة شيخ الأزهر  قالوا حاجة  في الموضوع دا  ؟

احتمال قالوا  و انا  ما عرفتش  ؟؟؟؟؟

لو كانوا  قالوا يا اخواننا  حد يطمني  …  ان  عندنا رجالة بتقف في الوقت المناسب تقول كلمة تضبط الموازين

طب لو كانوا قالوا  ..  ما سمعتش انه  اترفعت قضية على المذيع الفلاني و الكاتب العلاني  .. و في انتظار تطبيق حد القذف عليهم

و اللا كلام  فضيلة المفتي و فضيلة شيخ الأزهر  ما يسخنش حلة مية ؟؟؟ !!!

طب لو ما كانوش قاااااااالوا

ارجوكوا  كووووووووووولكوا  .. معايا في نفس واحد

نصحي فضيلة المفتي و نصحي فضيلة شيخ الأزهر

لأنه بصراحة كدا  … السكوت على مسألة زي دي  قلة أدب قومية

على رأي شعبولا

اصحى  يا عم المفتي  …  اصحى يا شيخ الأزهر

و هيييييييييييييييييييييييييييييييييييييه

بس خلاص

 

من حكايات جدتي .. الــ …. تلم الخلق عليك .. و تجيب اللي فيها فيك

يحكى أن  ..

واحدة لابسة خيمة .. كلها اسود في اسود .. راحت عند الحداد .. و بكل ادب و تحدي  ..  طلبت من الحداد طلب غريب جدا ..

اسمع يا اسطى .. ارجوك  ريحني .. ريحني من الذنب اللي عملته ..

خير يا ست ؟؟  عاوزة ايه  يا ست انتي يا كمل يا محترمة ؟؟

عاوزاك تريحني  و تقطع لي صباعي داهوه

اقطع صباعك  ؟؟  يا نهار مولع  و أحر من الكور اللي قدامي

ليييييييه ؟   حصل ايه يا ست  ؟

من يومين يا اسطى كنت في السوق .. و صباعي دا انكشف قدام الفكهاني  .. و من ساعتها   النوم طاير من عيني

يا سلام يا جدعان ع النسوان الكمل .. ايه الشرف دا  ؟  و ايه الاخلاق دي ؟

يا ست .. هو فيه مثالك في الزمن دا  ؟؟

صاحبنا قال البقين الاعجاب دول .. و قال لها تروح على بيتها ..

ثواني و استاذن من عند الحداد  .. ومشى ورا شريفة عصرها و اوانها

عرف البيت .. و بدا يسال

بعضهم قال له :  ما بلاش  .. بلااااااااااش

سعادته خلااااااص  .. اتسطل قول .. اتهوس قول .. اتعمى  جايز

بعد أسبوع كان اتربط  من ودانه تمااااااااااما

بعد الجواز باسبوع  .. رجعت ريما لعادتها القديمة .. بعد العشا   الافندي يشرب الشاي  و يروح سوااااااااح 

و الست هانم  ..  تطلع  ..  ما ترجعش الا وش الفجر

في يوم في العصاري .. قاعد بيلاعب واحد   الكوتشينة .. كل شوية يقول له  :  العب يا سطل  .. العب يا دلو 

كان مش عارف يرد عليه  يقول له ايه ..

و بما انه  شايف ست الصون و العفاف  .. عقلها راجح .. و الكل بيحلف بذكاءها  .. و  كتير بيستشيروها في مشاكلهم  .. راح  يشتكي لها  ..  قالت له  :  طنش  و ما تردش

راح تاني يوم  ..  بيلاعب نفس الشخص  ..  غير القافية … العب يا فتان

بعد اللعب .. واحد من اللي كانوا بيتفرجوا   اخده على جنب 

يا اخي انت صعبان عليا قوي … انت ايه   ؟؟؟؟  طوبة ما بتفهمش  ؟؟ 

ما تبقاش تشرب الشاي بعد العشا  .. و ابقى شوف  ايه اللي ها يجرى

صاحبنا عمل انه شرب الشاي  .. و راح  في نومته بتاع كل ليلة 

و الشريفة العفيفة  اتروقت و اتزوقت  .. قفلت باب البيت  … و سرحت

مرت الليلة النابغية 

عند مطلع الفجر  .. مفتاح الباب مش راضي يفتح  ..

بسلامتها فهمت الملعوب

ااااه يا قاسي .. من بعد زعلك مني  ما ليش عيش في الدنيا

و شالت حجر و رمته في بير قدام البيت 

خايب عصره و اوانه  فتح الباب و راح يبص على اللي حدفت نفسها في البير

صوتها من جوه البيت عالي   :  يا راجل يا ناقص  ..  بقى تسيبني  و تطلع على حل شعرك  تصرمح  في انصاص الليالي  ؟؟؟

اتفرجوا يا ناس على الراجل الدون  اللي سايب في البيت لهطة قشطة .. و طالع  ينش العفوش عن الفالصو و المغشوش

اللي طالعين يصلوا الفجر  كانوا بيرفعوا صوتهم بالاستغفار و التهليل و الحوقلة

أما بقى  اللي مقطعين السمكة و ديلها  .. و راجعين محششين ع الآخر …  ما قلنا لك ما بلااااااش

.

 

فتاوي تفرس .. نصوص بدون روح

 

مجموعة الفاروق البريدية   ..  ما اعرفش  بريدي وصل لهم ازاي  ..  المهم  .. بتوصلني منهم رسايل  بانتظام

الليلة اللي فاتت   ..  كنت في وردية ليل .. بعد ما تممت ع الاوضاع  و رتبتها مرحليا  .. قمت فاتح اللابتوب بتاعي  و وصلته في النت ..  علشان ارفع مجموعة كتب  في مخزن الويندوز لايف بتاع حسابي .. مسالة الرفع ها تاخد وقت  ..  قول تلاتة او اربع ساعات  ..  قفة كتب يا بيه

المهم .. قلت ابص ع البريد بتاعي  ..  لقيت الرسالة دي  ..  قراتها  .. و دماغي قلبت و راحت و جات ..  كنت عاوز  ارد في وقتها  ..  لكن  صعب  الرد   في الوقت دا  ..  لان حمل الشغل بيكون  تقيل

دي الرسالة :

س: هل يجوز لإنسان تصوير نفسه وإرسال الصورة إلى أهله في أوقات عيد ونحوها؟

ج: قد تكاثرت الأحاديث عن رسول الله صلى الله عليه وسلم في النهي عن التصوير ولعن المصورين ووعيدهم بأنواع الوعيد، فلا يجوز للمسلم أن يصور نفسه ولا أن يصور غيره من ذوات الأرواح إلا عند الضرورة كالجواز والتابعية ونحو ذلك. نسأل الله أن يصلح أحوال المسلمين، وأن يوفق ولاة الأمر للتمسك بشريعته والحذر مما خالفها إنه خير مسئول. والله الموفق.

المفتي: الشيخ عبدالعزيز بن باز

 

انا عاوز آخد  الكلمتين دول  ( فلا يجوز للمسلم أن يصور نفسه ولا أن يصور غيره من ذوات الأرواح إلا عند الضرورة كالجواز والتابعية  )    نعم  يا مولانا   ؟؟؟  احنا ها نفاصل   ؟

التصوير  حرام  و اللا مش  حرام   ؟   لو حرام  يبقى ما تقوليش  إلا عند الضرورة  ..  ممنوع الاستثناء بقى يا مولانا  ..  طب لو مش حرام  يا عم الحاج  …  يبقى ما تقرفناش في حياتنا  و تسود الدنيا في عنينا 

و بعدين  تعالى هنا  يا مولانا   ..  و لا أن يصور غيره من ذوات الأرواح إلا عند الضرورة .. الله الله الله   ..  يعني  لو صورت  قطة  يبقى فيها مشكلة  ؟  طب ايه  هي المشكلة  يا عمنا ؟

اللي اعرفه  يا عم  الحاج   ان التصوير   المقصود هنا   هو  التصوير  المجسم يا مولانا  ..  يعني التماثيل  يا عم  الحاج  ..  لا   و اقول  لك  كمان    ..   التصوير  المجسم  المجوف   مش  المصمت  و ابقى راجع  اقوال  العلماء  يا مولانا  .. فيه  آراء بتقول كدا   و فقهاء جامدين برضه  ..   ابقى راجع  راي  امام  دار الهجرة  في الحكاية دي

واحد  ها يقول لي  :  اصحى يا اسطى  ..  انت شكلك  راجع من  شفت الليل   دماغك  لاسعة  ..   انت بتكلم  مولانا  مين   ؟    مولانا  الله يرحمه  انتقل الى رحمة الله  .. 

انا كلامي  لكل (  مولانا )  على هذه الشاكلة   ..  مولانا  محشور جوه نصوص  كلامية  بيفهم معانيها  الحرفية  و يقف  عند  كدا   ..  مولانا  اللي   يقف بالدين  عند رص  كلام  بدون وعي  ..

اصل مولانا دا  الله يرحمه  قرات له فتوى   بتقول   :   اللي يقول ان الارض  كروية يبقى كافر  ..  و  مولانا دا  و نظراؤه   اللي بيكفروا  اللي  بيحلق  لحيته  ..   و مولانا دا و نظراؤه  اللي بيكفروا  المحجبة  ..  لااااازم  تكون منقبة  ..   و مولانا دا  اللي  بيحرم  على المراة  انها تسوق عربية 

سهل قوي عندهم  التكفير   الموالي  دول 

طيب يا مولانا  ..  في  امة لا إله  إلا الله     كام   مليار  شخص   ؟   ..   فيهم كام ميت مليون  اتصور  علشان  شهادة دراسية   او  عمل  جواز  سفر  او بطاقة  هوية   ..   دول  بقى  لا مؤاخذة  خرجوا  عن الملة   ؟؟    واحد  ها يقول  :  يا اخي  انت  فهمك  كام   على مقياس  رختر  ؟     ما   الراجل  قال  الا عند  الضرورة  كالجواز  او التابعية

ماااااشي    ..  هاطينها اكتر  بقى

حضراتكو    كدا بالصلاة على النبي     كنت  في دورة  أمن صناعي   و اخدنا  كورس  في الاسعافات الاولية  ..  لو واحد  في حالة غيبوبة   او حالة  كسر   او  او  او   ..  و عملنا  تدريباتنا   العملية   على مجسم  بشكل  الانسان   … و اخواننا  بتوع كلية الطب  اللي  لازم  يدرسوا  حسم الانسان  تفصيليا   و يعرفوا  الاجزاء   ..  بنشوف  عندهم  تماثيل هياكل  عظمية   مصنوعة من مواد  صناعية   ..  و بنشوف  اللي   بيعمل مجسم   لجهاز  من اجهزة  الانسان  زي  الجهاز  الهضمي  او التنفسي   …

يا عم  الشيخ   ..  التصاوير   ..  اللي هي   التماثيل    …    اللي   ممكن  تعبد   من  دون الله  ..  او ان الانسان  يتخذها شريك في العبادة   ..  هي اللي  يتقال فيها الكلام  دا

ايه راي  كل   الموالي  في صور  الملوك   و الرؤساء  و الأمراء   اللي  راكبة  فوق نفس البشر  في كل  مكتب  و جريدة  ؟      و فيه دول     لو واحد  اتعرف  انه لف  حاجة في ورقة  جريدة    ممكن يتسجن بسببها    …   ليه     ؟    لانه ممكن يصادف  و تكون صورة  فريد عصره و اوانه  في الورقة دي    ..   و بكدا يحل   قتل  او سجن  المسكين  

بذمتكوا يا موالينا   ..  مش الكلام  عن  حفظ  روح مسكين زي دا  اولى  انه  نتكلم   عن واحد  عاوز يبعت صورته لاهله  يطمنوا  عليه   ؟

طب انا   بقى    قاعد  بره  بلدي   ..  و هاكلم   قرايبي   على المسنجر   ..  و هاحط   كاميرا  ..  و قرايبي  ها يشوفوا   صورتي    …    اللي   يعمل كدا   ها يعذب   يا عم  الحاج 

ردوا علينا يا موالينا   ..  لو عندكوا رد   مقتع  

يا عم  الحاج   و كل   حاج   بيرص  كلام   محفوظ    بدون  وعي    ..   الله يصلح  حالكوا  و حالنا جميعا   …    اتعلموا    شوية  زيادة    علشان   تعرفوا   تنقلوا لنا  روح   العلم   مش   نصوصه   ..  لانه للاسف   لما بتنقلوا    مش  بتنقلوا  كل  اللي  يخص   الموضوع    ..  بتجيبوا بس   اللي   يمشي  على هواكوا    و توجهاتكوا 

ألا   يا مولانا  و كل مولى  ع الشاكلة   دي   ..  هي الارض  لسه   زي الصينية  اللي  بتدور   على  قرون  تور   ..  و الزلازل    بتحصل    لما قرن  التور بيتعب   بيقوم  التور  حادفها  على القرن  التاني   ؟

يا عم  الحاج   ..  التاسيس  للفتوى   يا مولانا  مسالة  لها رجالتها   ..  و اكتر  واحد  حسيت ان اخويا  فضيلة الشيخ  معجب  بتاسيسه  للفتوى    كان   فضيلة  المفتي   الشيخ  جاد الحق  الله يرحمه  و ليا الشرف   انه يكون  من قرية  قريبة من قريتنا 

 

 

.

بـــــرج أبـــو ظــــــــبي المـــــائـل

.

 

برج  أبو ظبي المائل

 

 

الصورة دي صورتها و انا ماشي بالجحشة بتاعتي

جنب المنصة  ..  قدام  أرض المعارض  .. بيبنوا البرج دا

طبعا  اللي يشوفه و بشكله دا  ها يفتكر برج بيزا المايل

بحثت في جوجل ( دخل الامارات من السياحة )

لقيت دخل الامارات من السياحة في السنة السابقة

حوالي 26 مليار دولار

الكلام دا منشور من سنة 2007

يا ترى مصر اللي بتملك تلتين آثار العالم  دخلها كااااام ؟

…..

كلمة :

على استعداد أن أمضي يومي في محاربة العالم أجمع

طالما سآوي آخر ليلي  إلى حضن ينسيني معاناتي تلك

و لكن .. لو أحسست ببذرة شوك في ذاك الحضن .. حينها  .. ألا تعس العيش

الأسطى

.

 

ساعات من الصمت الصاخب

اتعلمت العوم في ترعة بلدنا .. و بعدها اتنقلت لمرحلة اعلى شوية .. اتحولت للعوم في بحر بلدنا .. في اليوم دا كانت فرحتي مش سايعاها الدنيا بحالها .. كنت باعدي البحر بغلة بغلة .. و بحر بلدنا كان تلات بغلات .. كنت في الاول باسبح مع التيار .. لكن بعدها بقيت مشهور في السباحة ضد التيار

كنت وقتها في المرحلة الابتدائية .. و من باب الفكاهة السوداء كنت و انا نازل البحر اقول لراجل من الناس الكبار : عم .. عم .. امسك ايدي بس لغاية ما اعدل نفسي ع الحجر داهوه .. ايه يابني انت ما بتعرفش تعوم ؟؟ .. يمسك ايدي و انا عامل فيها ابلدون زمانه .. و هووووووووب .. اغطس تحت الميه .. و فييييييييييين .. قرب تلتين البحر اطلع من تحت الميه .. الحقني يا عم المتولي .. آآه يا عفريت .. كنت بتضحك عليا يا عفريت انته ؟

و ابدا في العوم ضد التيار علشان اوصل لحديد البغلة بتاع الكوبري قول مسافة من خمسين الى سبعين متر في النقطة اللي بيكون التيار عندها على اشده

اول مرة اروح فيها البحر المالح .. على راي ناس بلدنا .. لقيتني داخل داخل دااااخل و انا مش داري .. لقيتني هنااااااااك قرب جزيرة صغيرة و البشر بعيد .. لقيت العوم في البحر المالح اسهل بكتيييييييير من العوم في بحر بلدنا .. لأ و ايه ما فيهوش بلهارسيا

في الشهرين الاخيرين دول اتغيرت حاجات كتيرة في حياتي .. و لان اصحابي المفضلين همه البحر و الصحرا .. و علشان الجو بقى صيف و الرطوبة في ابوظبي بقت عالية .. يبقى الصاحب المفضل هو البحر بلا جدال

لقيتني باستغل اغلب اوقات فراغي جوه البحر

من اسبوعين تقريبا .. و كان يوم جمعه .. نزلت حوالي الساعة سبعة الصبح و ركبت الجحشة بتاعتي .. اتوجهت ناحية الراس الاخضر ورا قصر الامارات الشهير .. ربطت الجحشة في المربط و نزلت البحر

انا كان عندي هموم تقيلة قوي كنت خايف تاخدني و تنزل بيا في قاع الخليج ..

بدات رحلة المناغشة مع البحر .. لقيته مهموم زيي .. يا عم الحاج انا جاي اشكي لك همومي .. مكشر في وشي ليه ؟؟؟ ما اعرفش هل تكشيرة وشي الحديدية ضلمت مراية البحر في وشي و اللا ايه ؟

شوف يا عم البحر .. و لا تزعل .. هييييه .. و ركنت ضهري على مرتبة البحر .. و عينيا في السما .. و راح دماغي مقلب شرايطه شريط ورا شريط

و الشرايط عماله تكر .. و انا متطوح على ضهري على وش الميه و مش داري انا رايح فين .. لا دا انا ما كنتش حاسس اني باتحرك اصلا .. أمواج الفكر هي اللي كانت بتخبطني من شط لشط .. و مرارة الاحداث هي اللي كانت ممررة حلقي .. و ملوحة شكاوي سمعتها و قراتها عملت فيا كتير

رياح الغضب كانت بترفعني لغاية الشمس اخطف منها شعلة احرق بيها حاجات كتيرة .. و نسايم الهدوء كانت بتطبطب على قلبي تخليني احس انه الانغام جايه لي من كل العالم حواليا
حسيت ان مية البحر وسادة مغناطيسية مرييييحة .. عمالة تعيد تنظيم مغنطة حاجات كتيرة جوايا
Hey, how could you reach here ?
بصيت حواليا .. اخدت وضع العوم وقووووفا .. دارت حوارات .. استاذنت .. لسه ساعة على صلاة الجمعة

يااااا دووووووب الحق ادخل المسجد قبل طلوع الخطيب المنبر

عيناك .. نعش يحملني

.

عيناكِ ..
نعشٌ يحملني ..
رمدًا غجريًا
يعصرني قيحًا
يذرفني تحت رمادِ الليلِ
بلا أكفان

و شفاهُ النايِِ
تُدثرني
ترنيمةَ نورٍ
تعبر بي
حقبَ الأزمان

قد صرتُ شعاعًا
من بشرٍ
لفته زوايا الحزن
طحنتهُ
فقد العنوان

معذرةً
أبناءَ الصمتِ
قد انتحرت
هممُ الفرسان

.

البكباشي اللي خلاها خل

.

 

كنا بنقعد متسمرين قدام التليفزيون  نتفرج على المسلسل اللي اكتر من رائع  ( رافت الهجان )  و اللي مثل فيه دور البطولة الفنان محمود عبد العزيز ..  و من حسن حظ المسلسل ان الاراجوز عادل امام  اعترض على بداية المسلسل  .. فتم اسناد البطولة  للفنان محمود عبد العزيز   اللي بصراحة  باعشق تمثيله  ..  بيسبقه بقى في العشق دا  .. عبقري التمثيل  الفنان  احمد زكي الله يرحمه  ..  اللي باعتبره  الممثل رقم واحد في تاريخ التمثيل المصري  ..  انا ارفع القبعة   ( للقفا ) بتاع احمد زكي  في فيلم  ( البرئ )  لان دور البطولة  في الفيلم دا  .. قام بيها و باقتدار  ( قفا )  الفنان احمد زكي .. زي ما ام كلثوم هي عبقرية الصوت  و السنباطي هو عبقري النغم  فاحمد زكي بقى هو عبقري التمثيل

 

 

نرجع تاني لرافت الهجان  ..  كنت باسمع  لفظ  ( البكباشي )  و انا مش مدرك معناها قوي  ..  المهم عرفت انها رتبة عسكرية  ..  كانوا الاسرائيليين  في المسلسل  بيتكلموا باستهزاء  لما  ينطقوا  لفظ  البكباشي  .. و انا بفكري اللي لسه ما نضجش  كنت بافكر  انه دا  من باب شماتة العدو

 

 

في يوم في احد المنتديات  ..  كان فيه موضوع  عن الفاظ بننطقها في حياتنا العادية  و مش عارفين معناها ..  و اتوقفت  عند  المعنى الموجود  في الموضوع  للفظ  البكباشي ..   المعنى بيقول  ان البكباشي تعني الرجل بالف رجل

 

ساعتها  اتسمرت مكاني  ..  انا اعرف ان البكباشي رتبة  ..  رحت  ادور عن معنى كلمة بكباشي  اتصدمت

 

 

البكباشي  رتبة عسكرية  تساوي رتبة  مقدم 

 

يا خبر

 

بقى عبد الناصر  كان مقدم  ؟؟؟؟؟

 

اتصدمت بجد  

 

بقى مصر تصوم تصوم  و تفطر على مقدم   ؟؟؟؟؟؟

 

امبارح  لفيت لفة في النت قرات فيها شوية  عن شلة البكباشية و اليوزباشية و الصاغات

 

بكباشي  يعني مقدم   ..  صاغ  يعني رائد   .. يوزباشي يعني نقيب  .. انباشي  يعني ملازم 

 

 

لقيت في طريقي  ..  مذكرات  المرحوم محمد نجيب  قائد انقلاب يوليو  .. نزلتها  و ما قمتش من ع الكمبيوتر الا لما قراتها كلها  ..  حوالي 376 صفحة بالتمام و الكمال

 

ياااااا خبر

 

انا ما اعرفش  اليومين دول جرى لي ايه  

 

بس بجد   ..  انا نفسي اتهزت  علشان خاطر  لواء اركان حرب  محمد نجيب ..  اخو  اللواء علي نجيب   .. و ابن اللواء يوسف نجيب  ..   الراجل  اللي درس العسكرية   ..  و درس القانون  .. و عمل دراسات عليا في القانون و اللي اتعرض عليه منصب وزير الحربية في ايام الملك  ..  ييجي  حتة  بكباشي  يسلط  عليه صاغ  ؟؟؟؟؟؟

 

 

اخص عليكي بلد عاوزة الولد

 

و انا اقول هي بايظة ليه 

 

اتاري الحكاية وراها بكباشي 

 

ارقعي بالصوت يا خضرة

 

بكباشي  ياخد مكان  لواء !!  ..  و صاغ ( رائد ) يتحول بقدرة قادر يبقى لواء و يبقى قائد الجيش

 

انا لغاية الوقتي   عندي ذهول و احباط  بعد ما عرفت الحقايق دي 

 

بكباشي في حرب 48 يسال عليه ضابط يهودي ..  قال ايه صديقه .. في معسكر الفلوجا .. و على علاقة بعميل المخابرات المركزية في الشرق الاوسط  !!!!!!     الله الله الله

 

اتضح ان اللواء نجيب لما ما عجبوش لعب العيال و قدم استقالته .. الجماهير العريضة هي اللي رجعته غصب عن البكباشي .. لان البكباشي كان نكرة  .. بقى  يسرق تاريخ الراجل و يقولوا لنا ان اول رئيس لمصر هو جمال عبد الناصر  ؟؟ !!!

 

 

لا لا لا 

 

الواحد المفروض  يمسح باستيكة   الذاكرة المرة  و يرجع يملاها من جديد

 

 

   .