.
العرب ناس عندهم انفصام شخصية
اجدع ناس في التنظير
و أسوأ ناس ساعة تطبيق اللي بينادوا بيه
تلاقي الدقن نازلة لغاية كاحل القدم
و الوصايا التسع عشرة نازلة فوق دماغك
تقوم سعادتك تتخص من الفذ العلامة الحبر البحر الفهامة
فريد العصر و الأوان .. ذي الفهموت و الصولجان
لكن بقى تشوف تعاملاته .. تعطيه استمارة ستة
و تكبه في أقرب مقلب زبالة
..
في أيام ثانوي رحنا نلعب كورة في بلد بعيدة عن بلدنا
كان معايا واحد من اولاد اعمامي من فرع العيلة في كفر الشيخ
خلصنا الماتش
طالعين مروحين
طقت في نافوخي اشرب شاي
يا كابتن دي بلد صغيرة .. لا قهوة و لا كافيتيريا
هاشرب شاي
سلامو عليكو
و عليكم السلام و رحمة الله و بركاته
اتفضلوا يا كباتن
احنا متفضلين يا حاج من قبل ما تعزمنا
قعدنا ع المصطبة قدام الدار .. شاي يا هنية
شقاوة الشباب مع راجل خمسيني دمه زي العسل
الراجل جزار اد الدنيا
قعدنا .. انتو منين يا كباتن
من دميرة يا حاج .. و ابن عمي من بيلا
الكلام لفلف يمين و شمال .. من كل لون يا خضرة
قام ايه
دخل في الكلام عن السعودية و ناس السعودية
و انه راجع من اسبوع .. معلنا التوبة عن انه يسافر تاني
و انه زمااان كان سافر للحج و هو شبل مع ابوه و امه
قال : همه نسوا ؟ الله يرحم الأيام
لما كانوا بيروحوا في اماكن الحجاج المصريين
ياكلوا قشر البطيخ اللي بيرموه المصاروة
قام ايييه
قال لك .. دي التكية المصرية كانت مفتوحة ع البحري
قام ايييه
السعودية اشترت التكية المصرية
اصلها كانت وحشة قوي في وشهم يا ولداه
….
الوقتي بقى
مين الشاطر اللي يقول لي :
أين تقع التكية السعودية في مصر ؟
مش باهزر
انا باتكلم جد
اللي ها يعرف .. ها يزعل قوي قوي قوي
..
في ايام الملكية .. كانت مصر لها تكية
في ايام الحربجية .. السعودية احتلت حاجة غالية
و عملتها تكية
حزر فزر تطلع ايه
.
ليست هناك تعليقات:
إرسال تعليق