مجموعة الفاروق البريدية .. ما اعرفش بريدي وصل لهم ازاي .. المهم .. بتوصلني منهم رسايل بانتظام
الليلة اللي فاتت .. كنت في وردية ليل .. بعد ما تممت ع الاوضاع و رتبتها مرحليا .. قمت فاتح اللابتوب بتاعي و وصلته في النت .. علشان ارفع مجموعة كتب في مخزن الويندوز لايف بتاع حسابي .. مسالة الرفع ها تاخد وقت .. قول تلاتة او اربع ساعات .. قفة كتب يا بيه
المهم .. قلت ابص ع البريد بتاعي .. لقيت الرسالة دي .. قراتها .. و دماغي قلبت و راحت و جات .. كنت عاوز ارد في وقتها .. لكن صعب الرد في الوقت دا .. لان حمل الشغل بيكون تقيل
دي الرسالة :
س: هل يجوز لإنسان تصوير نفسه وإرسال الصورة إلى أهله في أوقات عيد ونحوها؟
ج: قد تكاثرت الأحاديث عن رسول الله صلى الله عليه وسلم في النهي عن التصوير ولعن المصورين ووعيدهم بأنواع الوعيد، فلا يجوز للمسلم أن يصور نفسه ولا أن يصور غيره من ذوات الأرواح إلا عند الضرورة كالجواز والتابعية ونحو ذلك. نسأل الله أن يصلح أحوال المسلمين، وأن يوفق ولاة الأمر للتمسك بشريعته والحذر مما خالفها إنه خير مسئول. والله الموفق.
المفتي: الشيخ عبدالعزيز بن باز
انا عاوز آخد الكلمتين دول ( فلا يجوز للمسلم أن يصور نفسه ولا أن يصور غيره من ذوات الأرواح إلا عند الضرورة كالجواز والتابعية ) نعم يا مولانا ؟؟؟ احنا ها نفاصل ؟
التصوير حرام و اللا مش حرام ؟ لو حرام يبقى ما تقوليش إلا عند الضرورة .. ممنوع الاستثناء بقى يا مولانا .. طب لو مش حرام يا عم الحاج … يبقى ما تقرفناش في حياتنا و تسود الدنيا في عنينا
و بعدين تعالى هنا يا مولانا .. و لا أن يصور غيره من ذوات الأرواح إلا عند الضرورة .. الله الله الله .. يعني لو صورت قطة يبقى فيها مشكلة ؟ طب ايه هي المشكلة يا عمنا ؟
اللي اعرفه يا عم الحاج ان التصوير المقصود هنا هو التصوير المجسم يا مولانا .. يعني التماثيل يا عم الحاج .. لا و اقول لك كمان .. التصوير المجسم المجوف مش المصمت و ابقى راجع اقوال العلماء يا مولانا .. فيه آراء بتقول كدا و فقهاء جامدين برضه .. ابقى راجع راي امام دار الهجرة في الحكاية دي
واحد ها يقول لي : اصحى يا اسطى .. انت شكلك راجع من شفت الليل دماغك لاسعة .. انت بتكلم مولانا مين ؟ مولانا الله يرحمه انتقل الى رحمة الله ..
انا كلامي لكل ( مولانا ) على هذه الشاكلة .. مولانا محشور جوه نصوص كلامية بيفهم معانيها الحرفية و يقف عند كدا .. مولانا اللي يقف بالدين عند رص كلام بدون وعي ..
اصل مولانا دا الله يرحمه قرات له فتوى بتقول : اللي يقول ان الارض كروية يبقى كافر .. و مولانا دا و نظراؤه اللي بيكفروا اللي بيحلق لحيته .. و مولانا دا و نظراؤه اللي بيكفروا المحجبة .. لااااازم تكون منقبة .. و مولانا دا اللي بيحرم على المراة انها تسوق عربية
سهل قوي عندهم التكفير الموالي دول
طيب يا مولانا .. في امة لا إله إلا الله كام مليار شخص ؟ .. فيهم كام ميت مليون اتصور علشان شهادة دراسية او عمل جواز سفر او بطاقة هوية .. دول بقى لا مؤاخذة خرجوا عن الملة ؟؟ واحد ها يقول : يا اخي انت فهمك كام على مقياس رختر ؟ ما الراجل قال الا عند الضرورة كالجواز او التابعية
ماااااشي .. هاطينها اكتر بقى
حضراتكو كدا بالصلاة على النبي كنت في دورة أمن صناعي و اخدنا كورس في الاسعافات الاولية .. لو واحد في حالة غيبوبة او حالة كسر او او او .. و عملنا تدريباتنا العملية على مجسم بشكل الانسان … و اخواننا بتوع كلية الطب اللي لازم يدرسوا حسم الانسان تفصيليا و يعرفوا الاجزاء .. بنشوف عندهم تماثيل هياكل عظمية مصنوعة من مواد صناعية .. و بنشوف اللي بيعمل مجسم لجهاز من اجهزة الانسان زي الجهاز الهضمي او التنفسي …
يا عم الشيخ .. التصاوير .. اللي هي التماثيل … اللي ممكن تعبد من دون الله .. او ان الانسان يتخذها شريك في العبادة .. هي اللي يتقال فيها الكلام دا
ايه راي كل الموالي في صور الملوك و الرؤساء و الأمراء اللي راكبة فوق نفس البشر في كل مكتب و جريدة ؟ و فيه دول لو واحد اتعرف انه لف حاجة في ورقة جريدة ممكن يتسجن بسببها … ليه ؟ لانه ممكن يصادف و تكون صورة فريد عصره و اوانه في الورقة دي .. و بكدا يحل قتل او سجن المسكين
بذمتكوا يا موالينا .. مش الكلام عن حفظ روح مسكين زي دا اولى انه نتكلم عن واحد عاوز يبعت صورته لاهله يطمنوا عليه ؟
طب انا بقى قاعد بره بلدي .. و هاكلم قرايبي على المسنجر .. و هاحط كاميرا .. و قرايبي ها يشوفوا صورتي … اللي يعمل كدا ها يعذب يا عم الحاج
ردوا علينا يا موالينا .. لو عندكوا رد مقتع
يا عم الحاج و كل حاج بيرص كلام محفوظ بدون وعي .. الله يصلح حالكوا و حالنا جميعا … اتعلموا شوية زيادة علشان تعرفوا تنقلوا لنا روح العلم مش نصوصه .. لانه للاسف لما بتنقلوا مش بتنقلوا كل اللي يخص الموضوع .. بتجيبوا بس اللي يمشي على هواكوا و توجهاتكوا
ألا يا مولانا و كل مولى ع الشاكلة دي .. هي الارض لسه زي الصينية اللي بتدور على قرون تور .. و الزلازل بتحصل لما قرن التور بيتعب بيقوم التور حادفها على القرن التاني ؟
يا عم الحاج .. التاسيس للفتوى يا مولانا مسالة لها رجالتها .. و اكتر واحد حسيت ان اخويا فضيلة الشيخ معجب بتاسيسه للفتوى كان فضيلة المفتي الشيخ جاد الحق الله يرحمه و ليا الشرف انه يكون من قرية قريبة من قريتنا
.
