يا ترى العواطف بيدرسوها في الجغرافيا ؟
يعني مثلا مثلا .. ممكن العواطف تتدرس تحت بند الجغرافيا السياسية ؟
واحد ها يقول : طب ازاي يعني ؟ ممكن تنورنا ؟
اقول لك ازاااي .. يعني مثلا .. ليه واحد يفرد شراعه و يمتد بحدود قلبه السياسية و يحب من الزقازيق مع ان سمنود اقرب ؟
و ليه واحد يخرج من الكهف الملكي بتاعه في غيط الدرة .. و يروح يدور على شباره بيضا بتستحمى في نور الليل بعطر النهر ؟
ليه فيه تشابه بين الظواهر المناخية و الدراما العاطفية ؟؟
يعني مثلا مثلا .. بكائية عاطفية تبلل المنديل .. ايه الفرق بينها و بين امطار خفيفة الى معتدلة جنوب القاهرة ؟
هجائية ساطورية مطبخية تسفر عن سقوط بسلامته فريسه لاسنان الغزالة .. و عاصفة رعدية غير موسمية تقتلع اتنين و عشرين جحش بركابهم .. و الحمار واقف بينفخ نفخته الشهيرة بعد تنهيقته اللولبية ..و يزعق و يقول : يللا .. اتنين و عشرين جحش غيرهم
سبعين الف امراة احببت .. كان عمنا نزار بيقول كدا .. و الله اعلم مع فرق العملة اليومين دول يطلعوا كاااام مليون .. و عمنا محمد بن عبد الوهاب كان قاعد ينعي حاله و يقول : طول عمري عايش لوحدي .. مقارنة دا بالجغرافيا السكانية .. يا ترى مين كنبا و مين الصين ؟ بيقول لك الحكومة الكنبية عاوزة رجالة تعمرها .. و احنا عندنا مش لاقيين شغلانة و لا حتى يعمروا اللمب الجاز ... الله يرحم ايام لمبتنا الجاز و الفول المدمس اللي كانت امي بتعمله عليها
ما تآخذونيييييش .. اللي مش فاهم حاجة .. يحاول يفهمني
هناك تعليقان (2):
بقولك ايه روح نام احسن
ماما امولة
حضرتك عرفتي ازاي اني تعبان و مرهق و فاصل من كله ؟
بس دا بستدعي ان الواحد يروح ينام ؟؟؟
طب فين طريق الكنبة ؟
اجيبك منين يا امه ؟ كنت احط دماغي على رجلها .. تهرش لي في شعري .. و اغني لحن الخلود .. اقصد ازود في اكل الرز بلبن
نورتيني يا مامتنا العزيزة
إرسال تعليق