.
دماغي قربت تلسع
انا اللي ياما لعبت بمعادلات تفاضلية جزئية
و لاعبت أطراف الكون بهندسات تفاضلية
و حاورت المكونات النووية عبر قرن كامل اللي هو عمرها
و لبست عباءة أبي العلاء و امتشقت سيف عنترة و هدني الدهر بحكمة زهير
ثلاثون حولا و من يعش .. ثلاثين حولا لا أبا لك يسأم
تعلمت العوم في ترعة الفلسفة اليونانية .. و أخدتها شرق و غرب من بغداد لقرطبة
من عند الغزالي ( تهافت الفلاسفة ) لابن رشد القرطبي ( تهافت التهافت )
ركبت قطار الفيزياء و الرياضيات اتنزه في عالم الفلسفة و الفكر
بصيت من نوافذ النور على علوم القرآن و الحديث و الفقه و السير
يعني باختصار : اظن ان انا ممكن اكون مثقف .. احتمال يعني
باحاول دايما ساعة دخولي لموضوع اني ابص بنظرة طائر Bird View استكشف بيها الموضوع و احدد مساراته الواسعة .. و بعد كدا ابقى ادخل في التفاصيل و السكك الفرعية و الحواري .. لغاية ما اوصل لديل الموضوع .. زنقة زنقة
.
انا قلت رأيي قبل كدا
الضباط بتوع انقلاب يوليو .. كانوا إفراز الإخوان
اللي انا شايفه .. انه حصل طلاق بائن بين الضباط و الإخوان
الطلقة الأولى كانت بعد حادث المنشية في الخمسينيات
الطلقة التانية كانت في الستينيات
قام اييييه .. النظام رجع العلاقة في ايام بابا أنور .. بس عرفي .. كدا و كدا يعني .. بدون ما يروحوا للمأذون
قام إييييه .. بعد ما العلاقة وصلت لهجر سراير في أيام بابا حسني .. و النظام سماها المحظورة .. و تم الطلاق .. و بانت المحظورة عن النظام بينونة كبرى لا رجعة فيها
المحظورة بقى .. كانت كارت إرهاب في إيد النظام ..
كل شويه يقول لك : أهوه .. لو مشينا .. الإخوان جاهزين
( ما اعرفش ليه هيلاري بتلعب لي شنبها و بتفكرني بكلينتون و مونيكا )
مات النظام .. و باقي ابن عمه .. بيغازل طليقة المرحوم
و الظاهر نفس العيلة مخها متركب نفس التركيب
..
أنا شايف ان نفس الأسلوب هو اللي ماشي
ما فيش فرق بين اللي اتعلموا في ليسيه الحرية و اللي اتعلموا في المدرسة الألمانية و اللي اتعلموا في مدرسة فيكتوريا و اللي اتعلموا في كتاب سيدنا الشيخ عبد الموجود .. و خلي بتوع قلة التربية و التهبيل على جنب
يا ترى ايه السبب ؟
هل الفيروس المباركي أصاب الكل و مالهوش دوا ؟
الكل بيقول نخلي انتخابات البرلمان للآخر .. يقول لك لأ .. اول حاجة تبقى انتخابات البرلمان
طب يا اخواننا .. نعمل دستور جديد و بلاش الترقيع .. يقول لك لأ .. و مين يوافق و مين يحلف و مين و مين …
يا عم الحاج .. احنا في مرحلة شرعية ثورية .. اسقطت نظام و مواثيقة اللي كانت بتربطه بالشعب .. و على كدا يبقى نحط مبادئ دستورية .. و يتعمل مجلس رئاسي من مجموعة مدنيين مع واحد من العسكريين .. و نبدأ نعمل قانون أحزاب بمعايير أنضف .. تلاقي فجأة الكلام اتنقل من عند دكانة زينب القرعة في شبرا و تلاقيه بيبص لك من غرزة عنايات العمشة في نزلة السمان
شفيق يا راجل .. من مرحلة ما اعرفش .. لمرحلة ادونا فرصة .. لمرحلة .. لمرحلة .. و أول ما ركب الناقة و شرخ .. بدأ جهاز قمل الدولة يفلسع .. الله .. طب حد يفهمني يا جدعان .. ايه الروابط السرية ؟
أنا حاسس انه فيه تلميع للمحظورة
هل التلميع دا تلقائي و عادي ؟
و اللا تلميع مقصود بيه الحرق ؟
و اللا تلميع مقصود بيه التفاف و حرق ؟
و اللا .. و اللا .. و اللا ؟
يا ترى اللي اتحقق من طلبات الثوار بيمثل كام في الميه ؟
ما مدى سهولة مشوار العودة ؟
يا خوفي ندخل نفق ستين سنة جاية استكمالا لستين فاتوا
.
