يا ديك الفجر .. قوم أذن

.

 

 

 

 

 

‫رماد الدمع يكسي القلب لون ليله

و نور الويل يقول للحب يا ويله‬

و ظل الروح بهت لونه و تاه دربه

و شايفه غريق محيط المر بمنديله

سراب حنطور دا عنوانهم .. يا ويل خيله

يا ديك الفجر .. قوم أذن .. يغني الحب مواويله

 

.

 

.

ايه الفرق .. بين الواد الديك .. و البنت الحنطور

.

 

 

وله   يا حمووووووو

هبو من الازرق  يا وله

في وصلة صياعة  قلما تتيحها  المقادير .. جلسنا فوق كوم تراب  في ليلة صيف مقمرة   .. 

رص  يا واااااااد   .. و روق علينا بالهبو الازرق

قلت لي  بقى  يا افندينا  :  انت  بتشتغل ايه  ؟

مدرس رياضيات 

رياضيات ايه يا مولانا  ؟؟؟  هو انت يا دووووب تقدر على رياضة واحدة  ..  يا عم  قوووم مص لك عود قصب  من الارض اللي جنبنا دي   ..  يممكن لما العودين يتحدوا   تربرب شوية

صهللت الادمغة   …  و  القمر  من بعيييييد  بيحدف دقيق على وش الرجالة

شباب زي الورد المفتح  ..  ما يضرش يعني  من وصلة  فرفشة  زرقا  .. 

النار تلعلع  في حجر  الجوزة  ..  و ريحة  الحشيش آخر سطلان  ..  و هوا  الغيطان   عمال يبعتر  في  الشباب اللي زي الورد  و  لا هوى عبده   في  أغنية  جانا الهوى جانا 

حكايات  و روايات   ..  نكت و قفشات  ..  و امشاط  و فلايات  ..  و غني  يا جدع

ايه يا هندزة  ؟  مش ناوي  تواصل  عادتك  اياها   ؟؟؟؟

ماشي  يا رجالة   ..  بس  مين  اللي ها يمسك الربابة  ؟؟؟

الاستاذ سيد   ..  لعيييب ربابة  .. ما فيش زيه في البر كله

تاااااااااني  ؟؟؟  رياضيات  تاني   ؟   ماشي

الليلة  ..  خيوبن  عليا   لو  ما نزلت  اطلال  السنباطي و ناجي و ام جلسون  و  اخليكو   ترقصوا  وياها  على  نغمات   الصبر طيب صبرنا احسن دوا   بتاع  خالتك  خضرة محمد خضر 

ماشي  يا ريس زكريا الحجاوي  ..  

تمايلوا  يمنة  و يسرة   ..  و أكفهم   تتناغم  على إيقاعات  رتيبة

آه يا فؤادي  لا تسل أين الهوى ى ى ى

كان صرحا من خيال فهوى ى ى ى ى

يبدو   أن  ما قرأه  عن  المدارس  التي نشأت في الغرب لتشويه الأعمال  الفنية  الشهيرة  مثل  الموناليزا قد  أثر عليه  في  الإتيان  على  علامات بارزة  مثل القصائد  المغناة   و قولبتها في  لحن  لو  سمعه ملحنها   لاستأجر له  أربعة شراقوة  يعزموه  مع القطر  و ينتهي من أمره    ساعة الفطار

قول  لنا يا شيخ  سعد   حتتين كدا  من  المشعلقات 

الشيخ  سعد  دا  بقى   قفل  الباب  على عالم  خفة الدم   و بيوزع  منه  بمزاجه 

و تتوالى  القصائد  الحلمنتيشية 

قلوب   انفلتت  من  عالم  الحزن    …  تطير  لا  تلوي  على شئ   ..  تطرب  و  تمرح   و  تتصاعد  مع  رنات  الضحكات  رقصات   ..  تضئ  وجه   البدر   بشعاعات  الأمل  

جمل  بارك  في  المبارك  ..  بياكل الدنيا و هو  بارك

قدييييييييمة   …  دا  فرن  خالتك  روحية

طيب  ..  خالتك  سرية  جاية من البرية  .. بتقول  قلعوني الهدوم اللي عليا 

دي  تبقى  عمتك   الكرنبة  و انت  الصادق

الاستاذ  سيد  :   نضارتي  راحت  فين   ؟

ههههه  …  شوف  يا أستذة  …  المسافة  بينك  و بين نضارتك  زي  المسافة  بين  ما لا نهاية الموجبة  و  ما لا نهاية  السالبة

فرك راسه  بحركة  عفوية  ..  يا ليل  مش  طالع له  نهاااار   …  ليه  ؟  خطفها  عفريت  و  سافر  ؟؟؟

يا  عم   الاستاذ  سيد   ..   مش  انت بتاع رياضيات  ؟؟؟

انت  يا واد   مش  قلت  اني  يا دوب  انفع  لرياضة واحدة بس  ؟؟

نضارتي  فين  ؟؟؟   شكلك  كدا  مخبيها 

يا استاذ  سيد   .. 

مش  انت  بتاع  رياضيات  ؟؟

و بتاع هندسة تفاضلية  ؟  و فضاء  منكوفسكي   ..  و  كون محدودب  ؟؟

يا عم  انت عمال  تقرف  الناس  يوميا   و تقول لهم   لولا منكوفسكي  ما كانش اينشتين  ..  و  اللا  هو  كلام   بيطلع  و خلاص  ؟؟

انت  يا واد  يا هندزة  ها تحيرني  معاك  في  الملعب  العصرية  ..  و ها تطلع  عيني   في  السهرة  الزرقا  دي  كمان   ؟؟؟

شوف  يا عم  الاساتيذ  كلاااااااتهم  كليلة

اقصر  الطرق  ايه  ؟؟؟  

الخط   المستقيم 

يا استاذ   الاساتيذ  …  اذا  ما كنتش  بتقول  ان  نيوتن  مات  و  هو مطمن ع  الرياضيات   لان الاستاذ  سيد  موجود  ..  هو  انت  يا عمنا  مش عارف  برضه  ان  ما فيش  حاجة  اسمها  خط  مستقيم   ؟؟؟؟

يعني  لو  مش  مستقيم   …  ها يبقى  منحني   ..  و المنحني  لا بد  لا بد   يرجع  لبدايته 

يعني   ما لا نهاية  الموجبة   ..  ها تلزق  في ما لا نهاية  السالبة 

ايوه  صح  

طب  حط  ايدك  على  عينك  يا عمنا 

دا ايه  دا   ؟؟؟  الظاهر  الواحد   تاه   مع   المزاج  العالي

 

انت  تعرف  يا استاذ  سيد    

 

تعرف  تقول لي  :

ايه  الفرق   بين  الواد  الديك  و البنت  الحنطور  ؟؟؟

 

 

انا  عارفك   يا واااااد  ..  سفوسطائي   ..  و ما حدش يقدر يسلك معاك

و كفاياني  الليلة دي  من خرابيشك

لا بجد  يا استاذ  سيد

ايه  الفرق   بين  الواد  الديك  و البنت  الحنطور  ؟؟؟

 

يعني إيه كلمة وطن ؟ مع تحديث

.

يا مؤمنين

يا موحدين

مين فيكو مين

يقدر يقول لي

يعني إيه كلمة ( وطن )

…

يعني إيه الشوق إليه ؟

يعني إيه يجري في دمي ؟

يعني إيه إليه أحن ؟

…

يعني إيه أرضى بعذابه ؟

يعني إليه ألحس ترابه ؟

يعني إيه تهون له نفسي ؟

و ف دمايا يتعجن

..

يعني إيه أوهب له روحي ؟

يعني إيه ترخص جروحي ؟

في سبيل كلمة وطن

…

يا ترى كلمة وطن

يبقى لها قيمة في الزمن

لما أحس بكل قلبي

إني عايز أتحضن

و الاقيني كومة في الكفن

؟؟؟ !!!

...

الوطن .. لو خان أماني .. ملعون أبوووه دا وطن

الوطن .. لو داس كرامتي .. ينداس عليه و لا ينسكن

الوطن .. لو باع شروقي .. يبقى مصيره للعفن

....

يمكن نكمل

…

مصر يا امه يا بهية

الطمي خدودك عليه

نوحي و شقي الجلابية

راضية هواني بين كلابك ؟؟

مش ها تشوفيني مرة تانية

…