.
الخيوط متداخلة و متشابكة .. عاوز افك الخيوط دي من بعضها
كل شوية بتظهر لي نقط جاية من كل اتجاه بتثير الحيرة في نفسي
فيه حزمة تصرفات غريبة بتشعلل زناد تفكيري
…
بيقولوا عنه .. الغائب الحاضر .. و بيترحموا على أيامه …
وصل الأمر في مصر مثلا أن قامت قوات الأمن في عهد الرئيس عبد الناصر إلى ترحيل العديد من الطلاب الفلسطينيين بملابس النوم إلى العراق وسوريا عقب قبول عبد الناصر مبادرة روجرز للسلام.
الكلام دا قرأته في موقع الجزيرة … و كلنا عارفين ان الجزيرة معقل لجنرالات الاعلام المضاد لمصر مبارك على وجه الخصوص
انقر هنا
…
انقر هنا كمان
السلطة الفلسطينية تنفي طرد مواطنيها من الامارات وتؤكد انها 'مزاعم لحماس روج لها الاعلام الايراني
……
اللي يقرأ في المذاهب و الفرق الإسلامية .. لاااااازم يتوقف عند التحالفات اللي الواحد بيشوفها دي
حماس بنت الإخوان .. ماااشي .. نعديها دي
حماس تكره الأنظمة العلمانية .. ماشي .. ما هي بنت ابوها
لكن تحالف اخواني شيعي ؟؟؟
تحالف إخواني وهابي ؟؟
تحالف إخواني زيدي ؟؟
…
هو ليه المقاومات الاسلامية بتتلخص في حزب الله و حماس و بس ؟؟؟؟
ليه المقاومة اللبنانية بتختصر إعلاميا في حزب الله و بس ؟؟
مع انه فيه مقاومات اسلامية تانية
و المقاومات الاسلامية دي موجودة في غزة
و خلي حد منهم يفتح بقه … شوف الحمساوية ها يعملوا فيه ايه
…
الفلسطينيين .. ليه انضربوا في الأردن في أيلول الأسود ؟؟
و ليه انضربوا في تل الزعتر ؟؟؟
و ليه الفلسطينيين الوقتي عايشين في لبنان تحت الخط الآدمي ؟؟
ليه انطردوا من الكويت ؟؟؟
ليه ؟ و ليييه ؟ و لييييييه ؟
تحديثاية صغيرة : اتضح لي كمان .. ان عمنا انور طردهم من مصر
السبب ايه يا مولانا ؟
قال لك : جوه بلدنا .. و الاذاعة بتاعتنا .. و اعطيناها لهم علشان يشرحوا قضيتهم .. قوم ايييه ؟؟ يشتمونا فيها و يشتموا دولتنا .. زيهم زي المساطيل التانيين بتوع العراق و سوريا و ليبيا و الجزائر .. و يتهمونا و يتهموا رئيسنا بالخيانة و العمالة .. ما هم بيقولوا ان الجزائر و العراق و ليبيا و سوريا كانوا عاملين جبهة ضد مصر .. كان اسمها جبهة الصمود و التصدي .. قال ايه .. عاوزين مصر تحارب باولادها و العرب يبقوا يعطوها فلوس
ايه يا جدعان ؟؟؟
يعني لاعب الجزائر الاخضر بلومي يضرب دكتور مصري في فندق مصري و يفقع عينه .. و دكتور مصري يتحكم عليه في السعودية بكام الف جلدة بشرع غير شرع الله و لاسباب دون آدمية و كلها ندالة .. و ما عاد الا الغزاوية كمان يضربونا ع الحدود و نطلع احنا اللي مقلوبين ..
احنا بقينا ملطشة للي يسوى و اللي ما يسواش
اجيبك منين يا ابراهيم باشا ؟؟؟
كانت الفيران ما بتخرجش من الجحور
انتهى التحديث
…
ليه العرب اتهموا انور بالخيانة ؟؟؟
ليه الفلسطينيين امتنعوا انهم يقبلوا باللي اقترحه الراجل لمصلحتهم ؟
ليه العرب رفضوا اللي عمله انور في اسطبل داوود على زعمهم ..
و بعدها بحوالي 15 سنة دخلوا قطعانا في زريبة مدريد
..
ليه العرب قبلوا بتقسيم فلسطين لدولة عربية و دولة عبرية ؟؟؟
و بعدين الاخوان شعللوا نار الحرب .. و من يومها و الحرب دايرة
ليه حماس بتصعد المواقف مع مصر ؟؟؟
ليه حماس اختصرت مصايبها كلها في مشكلة مفتعلة اسمها معبر رفح
مع انه فيه معابر غيره كتير
و ليه اللي جاي بيقدم مساعدة … بيقل ادبه على ارضنا ؟
افتعال المشاكل دا لمصلحة ميييين ؟؟؟؟؟
السؤال بقى : تصعيد حماس ضد مصر باتفاق مع اليهود ؟؟ و اللا عبط ؟؟
المخطط اليهودي هو إخلاء فلسطين من الفلسطينيين
و الكلام دا مش سر يعني .. دا كلام معلن و له خرايط
و اسرائيل بتضغط على الغزاوية عاوزة تكرههم في عيشتهم
يقوموا يعملوا ايه ؟؟؟؟؟
يطفشوا على سينا
…
بيقول لك ايه ؟
لما الملالي حكموا ايران .. الامريكان قالوا لصدام يللا فلسع البكر
و عن طريق دول عربية … قدموا صدام يحارب ايران
و لما الجحشين الايراني و العراقي اتهدت قوتهم و نزف دمهم
قامت امريكا .. عن طريق دول عربية .. ضاربة فتيل و أكلت صدام الشكولاته
صدام العبيط دخل الكويت .. و ليلتها كانت الاساطيل في الخليج
الاساطيل مسحت صدام .. و لسه قاعدة مكانها
دا صدام اللي كان ضد امريكا و الامبريالية
…….
يا ترى حماس دورها ايه الوقتي ؟
يا ترى جلوي جاي بمخطط رسمه له مين ؟؟
يا ترى تصعيد الوضع في رفح … بيشغل النظر عن ايه في دولة الملالي ؟
يا ترى النصيريين في دمشق بيشربوا ايه الوقتي ؟
و يا ترى .. يهود بيعملوا ايه الوقتي ؟
……
هدية للي عاوز يفهم
…
الأستاذ فهمي هويدي لما يكون حمساوي .. فدا مقبول
لكن
الأستاذ هيكل .. العلماني .. لما يلعب لمصلحة الملعب الحمساوي
المسألة بقى عاوزة يمين اسكندراني من حيفا لطنجة
يمين .. يعمل اعصار في المتوسط يغرق ايطاليا و اليونان
و الواحد لازم يقف انتباه
..
شوف يا عم حسني
لو حصلت انتخابات بكره الصبح … صدقني مش هانتخبك
لكن انا معااااااااااااك في موقفك دا
…
هييييه ؟؟؟
لسه عاوزين تاكلوا الشكولاته ؟؟؟؟
.
